Pas kriminelit Vuçiç, Edi Rama : KFOR të marrë nën kontroll veriun!
Misioni i NATO-s dështoi në Kosovë dhe ndodhi sulmi terrorist serb, por Kryeministri Edi Rama iu ndërsye misionit të Bashkimit Europian dhe zëdhënësit të saj i cili çfarë thotë para dite nuk e përsërit në mbrëmje! Por, shumë shpejtë u kutpua se gjithë këtë rrëmujë në daljen e tij publike e bëri për të promovuar kërkesën e kriminelit Aleksandar Vuçiç, duke kërkuar që KFOR-i të marrë nën kontroll veriun e Kosovës; Po ky KFOR i cili lejoi hyrjen e armatimit masiv nga ushtria serbe, që shërbeu dhe për vrasjen e policit kosovar, Afrim Bunjaku!
“E dëgjuam me shumë vëmendje të gjithë zëdhënësin e Brukselit, i cili tha se nuk mund të ketë një deklaratë tjetër pa rezultatet e hetimit mbi si ka rrjedhur ngjarja e Banjskës. Edhe mund të ishim dakord me këtë nëse minimalisht Serbia do të ishte distancuar nga grupi kriminal që i mori jetën efektivit të polic së Kosovës dhe do të kishte deklaruar hapjen e një hetimi serioz e të pavarur, por fatkeqësisht Republika e Serbisë zgjodhi nderimin për të vrarët nga forcat speciale të Kosovës duke shpallur një ditë zie kombëtare.
Atëherë çfarë hetimi pret BE-ja. Nga kush? Nga autoritetet e drejtësisë në Kosovë? Dhe me këtë do ishim dakord por nuk e dëgjova zëdhënësin e BE-së ta thotë dhe nuk besoj se BE do t’i pranonte rezultatet e Kosovës pavarësisht se ata që e provokuan ishin serbë dhe pavarësisht se policia e Kosovës shkuan në vendngjarje për të ndaluar përshkallëzimin e terrorit nga grupi kriminal serbe.
A mos po heton BE-ja në mënyrë të pavarur? Do ishte mirë, por nuk e dimë nëse BE-ja ka angazhuar një mekanizëm në këtë drejtim. Sikur ta dëgjonim këtë do lehtësoheshim disi, por vetëm në këtë drejtim. Gjithsesi çka ne kërkuam me miqtë në Bruksel, nuk është rezultat i një hetimi që është i mirëseardhur, por dënimi pa ekuivok i vrasjes së një efektivi të policisë nga një grup kriminal dhe gjithashtu nderimi i një akti absurd kombëtar në Serbi i disa kriminelëve, të armatosur deri në dhëmbë, të cilët u shfaqën në Banjskë për demonstrimin e një force të paligjshme me gjuhën e armëve të rënda dhe u asgjësuan nga rendi kushtetues i Republikës së Kosovës. Çdo interpretim i mundshëm nuk i ndryshon dot këto fakte,” tha Edi Rama për gjërat që vetëm ai dhe batonët me buzhalët nuk i nxirrnin nga goja ndërsa shtoj dhe atë që vetëm Presidenti i Serbisë, Aleksandar Vuçiç e deklaron, kontrollin e veriut vetëm nga KFOR-i.
“Kohë përpara këtyre zhvillimeve kaq dramatike, e kam thënë dhe kërkuar disa herë publikisht se formati i dialogut të normalizimit duhej ngritur në planin e një konference. Ndërsa përfaqësimi i BE dhe i komunitetit euroatlantik në dialog duhej ngritur edhe ai në nivelin më të lartë me Francën dhe Gjermaninë në konferencë si bashkëautore të këtij plani, sot besoj është e qartë që formati i Brukselit, nuk ka më asgjë për t’i ofruar paqes në këtë situatë të re. Kjo besoj minimalisht është e qartë,” tha Rama duke shprehur shqetësimin se gjërat mund të shkojnë larg dhe mund të shkojnë shpejt.
“Ndaj jo vetëm niveli i përfaqësimit të komunitetit euroatlantik duhet ngritur larg dhe duhet ngritur shpejt, por duhet pasur parasysh që kjo të bëhet se përndryshe bashkë me stokun e gjithë atyre marrëveshjeve përgjithësisht të pazbatuara, vonesa në hedhjen e këtij hapi mund të sjellë dhe një stok viktimash të një konflikti të armatosur Për të parandaluar këtë konflikt, KFOR duhet të marrë në kontroll veriun e Kosovës. Është një propozim që e kam bërë më parë, edhe në Samitin e NATO-s.
Udhëheqja e Kosovës i ka kusuret e veta në procesin e dialogut me Serbinë, por asnjë nga ato kusure nuk e relativizon dot peshën e jashtëzakonshme të këtyre zhvillimeve të rënda, të cilat nuk krahasohen me asgjë të keqe të ndodhur mes Kosovës dhe Serbisë që nga viti 1999,” tha Rama duke folur për karshillëk ilegal dhe institucional.
“Këtu jemi përpara derdhjes së gjakut të pafajshëm dhe nuk është gjaku i një kalimtari që u vra në rrugë nga një makinë me targa serbe, por gjaku i një efektivi të policisë së Shtetit të Kosovës, i cili nuk vrau veten se pa disa civilë serbë të armatosur me çifte, por nga njerëz të veshur ushtarakisht dhe të armatosur rëndë që për Beogradin zyrtar janë të denjë për ta ulur flamurin në gjysmështizë. Ky është një karshillëk sa ilegal nga ana e grupit kriminal aq dhe institucional nga ana e shtetit serb ndaj vlerave dhe parimeve të BE, që nuk ka nevojë për hetim, por kërkon dënim me zë të lartë dhe me gjuhë të qartë.
Jo vetëm sepse familjarët e policit të vrarë, populli i Kosovës, Republika e Kosovës e meritojnë të dëgjojnë autoritetin moral dhe politik të BE-së, jo për të shtatat e as për të dyzetat e shërbëtorit të pafajshëm të shtetit të Kosovës, por sepse e meriton dhe e pret ta dëgjojë i gjithë ky rajon që boll ka vuajtur në historinë e vetë,” tha Kryeministri Edi Rama ndërsa e pranoi se nuk ka ndryshuar qëndrim u fut në strehën e fundit që i ka ngelur, patriotizmin.
“Unë nuk kam ndryshuar në asgjë, në asgjë. Një mijë herë të kthehemi mbrapa, një mijë do bëja të njëjtat gjëra, do thosha të njëjtat gjëra. Sot po bëj një bilanc të gjërave që kam thënë më parë dhe njëkohësisht po bëj atë që them gjithmonë.
Unë them atë që mendoj dhe unë mendoj atë që më fryjnë në vesh dy forca që më kanë kapur mua që kur kam marrë këtë detyrë, njëra është kjo këtu, shqiponja dy krenare e flamurit të Skënderbeut dhe Ismail Qemalit dhe tjetra forcë kjo këtu, flamur i BE. Ëndrra ime është që kjo të fluturojë sa më lart që të futet këtu. Mund të kem të drejtë dhe gabim, por këto janë forcat që më kanë kapur mua dhe me këto forca punoj në mendimet e mia dhe në emër të këtyre forcave formuloj dhe mendimet e mia. Të tjerat janë historia telenovelash që nuk kanë lidhje e me mua.”
