Pas kritikave të Trumpit, Zelenskyy zhvillon bisedime me aleatët evropianë në Londër
Presidenti ukrainas, Volodymyr Zelenskyy, do të takohet sot me aleatët e tij kyç evropianë në Londër, pasi presidenti amerikan, Donald Trump, e akuzoi atë se nuk e kishte lexuar propozimin më të fundit për paqe.
“Ne po nisim një javë të re diplomatike tani, do të ketë konsultime me udhëheqësit evropianë. Para së gjithash, çështjet e sigurisë, mbështetja për qëndrueshmërinë tonë dhe paketat mbështetëse për mbrojtjen tonë”, tha Zelenskyy gjatë mbrëmjes së djeshme.
Në Londër, Zelensky pritet të takohet me kryeministrin britanik, Keir Starmer, presidentin francez, Emmanuel Macron, dhe kancelarin gjerman, Friedrich Merz, që janë përkrahësit më të mëdhenj të Kievit në Evropë.
Ndërkohë, duke folur para gazetarëve, presidenti i SHBA-së, Donald Trump, kritikoi homologun e tij ukrainas, duke thënë se ishte “pak i zhgënjyer”.
“Ne kemi biseduar me presidentin rus Vladimir Putin, dhe kemi biseduar me udhëheqësit ukrainas, përfshirë Zelenskyyn, dhe duhet të them se jam pak i zhgënjyer që presidenti Zelensky ende nuk e ka lexuar propozimin, të paktën para disa orësh,” tha dje Presidenti Trump.
Bisedimet në Londër vijnë pas tri ditë negociatash midis zyrtarëve ukrainas dhe atyre amerikanë në Majami. Këto diskutime përfunduan me një ton pozitiv, por pa ndonjë përparim konkret.
Administrata e presidentit Trump po i bën presion Kievit të pranojë një propozim paqeje që shumë kritikë thonë se anon dukshëm në favor të Rusisë.
Pas negociatave në Majami, Zelensky tha se kishte biseduar me Steve Witkoff dhe Jared Kushner.
“Të dërguarit amerikanë janë të informuar për pozicionet kryesore të Ukrainës dhe biseda ishte konstruktive, megjithëse jo e lehtë”, tha Zelenskyy.
“Pres informacione të detajuara prej tyre për gjithçka që u është thënë emisarëve amerikanë në Moskë, si dhe për nuancat që amerikanët janë të gatshëm t’i modifikojnë në negociatat me ne dhe me rusët”, shtoi Zelenskyy, duke iu referuar kryenegociatorëve ukrainas, Rustem Umerov dhe Andriy Hnatov, të cilët përfaqësuan Ukrainën në negociatat në Majami.
Ndërkaq, Rusia ka vazhduar sulmet ajrore ndaj infrastrukturës kyç të Ukrainës teksa temperaturat e dimrit vazhdojnë të bien.
Forcat ruse sulmuan qytetin Ohtirka në rajonin e Sumit në orët e para të ditës së sotme, raportojnë autoritetet lokale.
Guvernatori Oleh Hryhorov tha se shtatë persona u plagosën nga një sulm ndaj një ndërtese banimi nëntëkatëshe, të cilët u dërguan në spital.
Sipas Shërbimit të Emergjencave të Ukrainës, zjarrfikësit shuan një zjarr që kishte përfshirë katin e dytë deri në të pestin dhe evakuuan 35 banorë, duke shpëtuar shtatë persona, përfshirë një fëmijë, nga banesat e dëmtuara.
Në Çernihiv, një ndërtesë banimi u dëmtua si pasojë e rrëzimit të një droni rus. Tre persona u plagosën, një prej të cilëve u hospitalizua, shprehet sot Shërbimi i Emergjencave përmes rrjetit social Telegram.
Përpara vizitave të planifikuara të Zelenskyt në Londër, Bruksel dhe Romë për të diskutuar për procesin e paqes, kryeministrja italiane, Giorgia Meloni, zhvilloi me të një bisedë telefonike.
Ajo rikonfirmoi solidaritetin e Italisë me Kievin dhe u zotua se do t’i dërgojë ndihmë për të mbështetur infrastrukturën energjetike të Ukrainës dhe popullsinë e saj.
Zyra e Melonit shtoi se Italia do të dërgojë furnizime shtesë, përfshirë gjeneratorë, për të mbështetur infrastrukturën energjetike dhe popullsinë ukrainase, duke theksuar se qëllimi mbetet një paqe e qëndrueshme dhe e drejtë./RFE/
