Pas largimit të barrikadave nga Jarinja dhe Bërnjaku, tërhiqet edhe Njësia Speciale

Ashtu siç ishte e parashikuar me marrëveshjen e arritur në Bruksel ndërmjet Kosovës dhe Serbisë për targat, janë larguar barrikadat nga Jarinja dhe Bërnjaku. Po ashtu është tërhequr edhe Njësia Speciale e Policisë së Kosovës, duke ia liruar hapësirën për veprim KFOR-it.

Ndryshe, 13 ditë më parë kur edhe u vendos reciprociteti për targat, disa grupe serbe u barrikaduan në rrugët e Jarinjës dhe Bërnjakut duke pamundësuar lëvizjen e lirë drejt pikave kufitare.

Ndërsa Njësia Speciale e Kosovës, u vendos për të ruajtur rendin dhe qetësinë.

Por, jo gjithçka shkoi siç ishte parashikuar me marrëveshje. Fillimisht ishte Kryetari i Komunës Leposaviç, Zoran Todiç, i cili tha se mbetet kërkesë e protestuesve që fillimisht të tërhiqet Njësia Speciale e Policisë së Kosovë, në të kundërtën barrikadat nuk do të tërhiqen.

“Jemi këtu me pjesëtarët e KFOR-it. Njerëzit e kanë liruar një korsi të rrugës që ushtarët e KFOR-it të vijnë pa pengesa në lokacionin ku gjenden për momentin këto forca speciale të Policisë së Kosovës. Ajo që është kërkuar është bërë, dhe në bisedime me njerëzit e KFOR-it është kërkuar qe njësitë e ROSU të tërhiqen, dhe në atë moment që njësit ROSU të tërhiqen, edhe kjo e gjitha do të largohet na rruga. KFOR i është i vendosur që këtë marrëveshje ta respektojë deri në fund, asgjë nuk mund të behet, në atë moment që të gjithë të mund të kthehemi jetës normale”, tha ai para gazetarëve”, tha Todiç duke shtuar se mes shqiptarëve dhe serbëve duhet të mbretërojë paqja, por që mbron protestuesit të cilët janë barrikaduar tash e 13 ditë në rrugët që shpien në pikat kufitare në Bërnjak dhe Jarinjë.

Ndërkohë Njësia Speciale e Policisë së Kosovë ishte e qartë se do të largohet vetëm atëherë kur nuk do të ketë barrikada ndërsa KFOR-i ka siguruar se do të qëndrojë për dy javët në vijim në pikat kufitare ku dhe do të ofrojë siguri për të gjithë qytetarët pa dallim.

Pas urdhërit që morën nga Beogradi serbët filluan të largojnë barrikadat dhe gati krejt në fund, kur të gjithë menduan se procesi i heqjes së barrikadave po shkon në rregull, Policia e Kosovës ka insistuar që të hiqet edhe një kamion që po qëndronte skaj rrugës, por që në të është vendosur një mbishkrim me shkronja të mëdha në alfabetin cirilik “Mirë se vini në Asociacionin e Komunave serbe”.

Edhe pse policia kërkoi të lajmërohet vozitësi dhe ta heq kamionin, ai nuk u lajmërua, derisa disa serbë të tubuar para këtij kamioni filluan të provokojnë duke brohoritur Serbia-Serbia. Në këtë situatë, Njësitë speciale nuk kanë vazhduar por janë kthyer në pozicionet e tyre fillestare dhe srbët sërish iu nënshtruan forcave të ligjit.

Pas largimit të barrikadave, situatën nën kontroll e mori KFOR-i ashtu siç parashikon dhe Marrëveshja e Brukselit, ku nga kjo fundjavë e deri në dy javët e ardhshme, ky mision do të jetë prezent në Jarinje dhe Bërnjak.

Ndërsa duke e filluar nga dita e hënë, Kosova dhe Serbia do të zbatojnë vendosjen e etiketave ngjitëse për të mbuluar simbolet shtetërore në targat e automjeteve.