Pas lirimit të protestuesit/ Sandër Lleshaj kërcënon gjyqtarin me Vetting, Gjykata: S’kishte prova!
Pas vendimit të sotëm të gjyqtarit të Gjykatës së Shkallës së Parë Fier, Pirro Sota, për të liruar nëpunësin e Bashkisë Mallakastër, për të cilin policia pretendonte se goditi me gur në kokë një punonjës policie në krye të detyrës, ka shkaktuar reagim të ashpër të Policisë së Shtetit.
Një një reagim aspak zyrtar, ku përmendet edhe gjaku e policët dëshmor, Policia e Shtetit kërcënon gjyqtarin sota me padi dhe vetting:
“Policia e Shtetit do të depozitojë padi penale ndaj gjyqtarit Sota, si dhe do të referojë pranë organeve të Vettingut dokumentacionin që provon absurditetin e vendimit të tij,” thekson reagimi i Policisë së Sandër Lleshajt që tashmë ka harruar edhe misionin që ka.
Por i menjëhershëm ishte edhe reagimi i Gjykatës së Fierit.
Pasi Policia e Shtetit e quajti “absurd” vendimin e Gjykatës së Fierit, për lirimin e protestuesit Pëllumb Isufaj, i cili akuzohet se qëlloi me gur efektivin e policisë gjatë protestës së opozitës në Fier, Gjykata e Fierit sqaron se vendimi për Isufajn erdhi pasi nuk provohet se ishte ai autori i goditjes ndaj policit.
Gjykata e Fierit sqaron më tej se nga provat, rezulton që personi që ka goditur të jetë më i ri në moshë.
Reagim i Policisë së Shtetit
Vendimi i sotëm i gjyqtarit të Gjykatës së Shkallës së Parë Fier, Pirro Sota, për të liruar nëpunësin e Bashkisë Mallakastër, që goditi me gur në kokë një punonjës policie në krye të detyrës, ka tronditur të gjithë Policinë e Shtetit.
Arroganca, shpërfillja ekstreme e ligjit dhe injorimi flagrant i provave të pakundërshtueshme dhe i raporteve të shërbimit të Policisë së Shtetit, që provonin atë që ka parë tashmë gjithë Shqipëria, janë të papranueshme.
Punonjësit e Policisë së Shtetit kanë mbrojtjen e veçantë të ligjit, gjatë ushtrimit të detyrës së tyre.
Rreziku për jetën e punonjësve të PSH, shtohet jo vetëm nga papërgjegjshmëria e elementëve kriminalë, por edhe e gjyqtarëve të lidhur me krimin.
Policia e Shtetit e ka dëshmuar me gjakun e qindra dëshmorëve, përgjegjësinë e saj publike dhe nuk mund të pajtohet me vendime skandaloze të ndonjë gjyqtari të papërgjegjshëm, vendime të cilat jo rrallë herë kanë lënë të pandëshkuar jo vetëm autorët e plagosjeve ndaj policëve, si rasti aktual i Fierit, por edhe vrasësit e tyre. PSH do të ndërmarrë të gjitha masat ligjore si për të mbrojtur jetën e punonjësve të saj, ashtu dhe për të vënë përpara drejtësisë bashkëpunëtorët e krimit, edhe kur këta mbajnë të veshur padrejtësisht mantelin e gjyqtarit.
