Pas Manastirliut, Shehu: Asgjë reale, janë fshehur 16 mijë humbje jete deri në korrik
Pas fjalës së ministres së Shëndetësisë, Ogerta Manastirliu, në interpelancën për situatën e COVID-19 ka reaguar deputeti i PD, Tritan Shehu, duke theksuar se asgjë nuk ishte reale sot kur Shqipëria ka 16 mijë humbje jete deri në korrik, 50 mjekë të vdekur, duke na vënë të parët nga fundi në Europë dhe në majat e katastrofës në botë. Amullia me pandeminë vazhdon, tha Tritan Shehu, dhe mazhoranca nuk mori parasysh asnjë nga sugjerimet e opozitës.
“Fjala juaj e mbushur plot me sofizma, asgjë reale dhe ishte thjesht një fjalë e mbajtur në linjën tuaj e cila bazohet vetëm tek fasada dhe jo tek përmbajtja.
Ju penalizuat dhe përjashtuat dhe sistemin parësor, duke e përqendruar çdo gjë tek ajo urgjencë çalamane duke i braktisur njerëzit. Bllokuat sistemin spitalor duke koncentruar gjithçka në Tiranë. Nuk lejuat spitalet periferike të ishin pjesë e kësaj përpjekje masive.
Zgjatët vetëm disa tuba bakri. Kërkuam vënien në gatishmëri të 150 posteve të reanimacionit, humbjet ishin tragjike. Nuk morët asnjë masë efektive për mbrojtjen e mjekëve. Përfundimi, 50 mjekë që humbën jetën duke na vendosur ndër 3 vendet me humbjet më të mëdha të mjekëve në raport me numrin e popullsisë. Vepruat në mënyrën më hermetike me laboratorët e testimit.
Ju nuk e dini sa kanë shpenzuar shqiptarët për antiviralët që ju nuk i liberalizuat kurrë. Në Gjermani një test i shpejtë blihej 6 euro, tek ne iu shitej shqiptarëve në nën dorë 60-70 euro.
Shqipëria sot ka 16 mijë humbje jete deri në korrik, 50 mjekë të vdekur, duke na vënë të parët nga fundi në Europë dhe në majat e katastrofës në botë. I kanë thënë institucionet ndërkombëtare këto shifra. Janë fshehur vdekjet dhe rastet e infektimit, duke i rregulluar me një çelës poshtë tavoline. Janë fshehur vdekjet duke ndryshuar diagnozat. Nuk janë deklaruar rastet që kanë marrë mjekim ambulator, në spitalet private dhe jashtë shtetit. Nuk u vendosën rregulla të qarta, u lejua amullia, gjysmë ilegaliteti. Edhe shuma qesharake për rimbursimin thuajse nuk është prekur,” tha deputeti i PD, Tritan Shehu duke përfunduar:
“Kjo amulli vazhdon!”
