Pas masave reciproke/ Reagimi, Dimovski: Nuk vlejnë vetëm për Kosovën!

Pas vendosjes së masave reciproke nga Kosova, sot ka reaguar Ministri i Bujqësisë i Maqedonisë së Veriut, Trajan Dimovski duke theksuar se ndalimi i importit të peshkut dhe rasadit të peshkut nga Kosova nuk është ndalesë e posaçme vetëm për Kosovën. Sipas Dimovskit, Maqedonia e Veriut synon të marrë lejen për eksport të peshkut të freskët në tregun evropian dhe për këtë shkak janë rritur standardet në këtë industri dh ebeson se së shpejti do të arrihet zgjidhje përmes dialogut.

“Nuk po implementojnë monitorimin, nuk kanë ndalesë eksplicite, të themi vetëm pse janë prodhime të Republikës së Kosovës, por se masa vlen për të gjithë shtetet tjera. Nëse dëshmohet se po implementojnë monitorimin, nuk do të ketë asnjë problem,” tha Trajan Dimovski.

Ndryshe, autoritetet kosovare dje kanë vendosur masa reciprociteti për importin e mjaltit dhe patateve nga Maqedonia e Veriut. Shkak për këtë është vendimi i Maqedonisë së Veriut për ndalimin e importit të peshkut dhe rasadit të peshqve nga Kosova.

Maqedonia e Veriut, raporton Alsat, gjatë vitit eksporton rreth 40 deri 1000 ton patate në Kosovë, ndërsa vlera e mjaltit të eksportuar në Kosovë arrin rreth 400.000 euro.