Pas maskaradës me inceneratorët, Parlamenti ratifikon dy marrëveshjet Shqipëri-Kosovë

Me 76 vota pro dhe 34 kundër, Parlamenti i Shqipërisë miratoi raportin përfundimtar të deputetëve të PS-së në Komisionin Hetimor për ligjshmërinë e ndërtimit të impianteve të trajtimit të mbetjeve urbane në Tiranë, Elbasan dhe Fier. Ndërsa raporti i hartuar nga deputetët e PD u rrëzua pasi mori vetëm 27 vota dhe 84 ishin kundër.

Me përmbylljen e kësaj maskarade me inceneratorët, ku Raporti i Komisionit Hetimor të PD nuk u votua as nga ata deputetë që e propozuan ngritjen e këtij Komisioni, Parlamenti i Shqipërisë ratifikojë dy marrëveshjet e shumëpritura nga shqiptarët në mes të Kosovës dhe Shqipërisë.

Projektligji “Për ratifikimin e marrëveshjes, ndërmjet Republikës së Shqipërisë dhe Republikës së Kosovës, për sigurime shoqërore” dhe projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Kosovës, për rregullat e regjimit të trafikut lokal të kufirit”, u miratuan me 111 vota për.

Kryetarja e Parlamentit, Lindita Nikolla, vlerësoi ratifikimin e këtyre dy marrëveshjeve të rëndësishme, me një dimension të fuqishëm kombëtar, ekonomik, social e njerëzor, që afrojnë më shumë Shqipërinë me Kosovën.