Pas mbledhjes së Kryesisë PS, Rama: Diskutuam strategjinë për Qershorin 2021…
Kryetari i PS dhe Kryeministri Edi Rama pas mbledhjes së Kryesisë së Partisë Socialiste tha se është diskutuar për Përgjegjësitë deri në zgjedhjet e 30 Qershorit dhe hartimit të strategjive për zgjedhjet e Qershorit 2021, ndërsa i dha përgjigje edhe Presidentit të Republikës për 13 Tetorin si ditën e mundshme të zgjidhjes së krizës politike në vend.
Dhe jo vetëm kaq! Edi Rama u mundua të bindë opinionin se në partinë që ai drejton zhvillohet edhe debat:
“Ndryshe nga çfarë shpesh thuhet gabimisht, ne diskutojmë hapur dhe jemi ballafaquar me të gjithë elementët që kemi vënë në tavolinë për të adresuar dhe me të gjitha përgjegjësitë që secili ka për të vijuar këtë proces, që kemi luksin ta zhvillojmë edhe në një kohë përpara vitit të ri politik, shtator.
Kemi pasur një diskutim të gjatë me pjesëmarrjen e të gjithëve për të vijuar procesin e brendshëm, sepse kemi mësuar që pas çdo procesi zgjedhor pavarësisht fitores është shumë e rëndësishme të kuptojmë se ku janë problemet që duhen trajtuar dhe të përpiqemi së bashku të lexojmë votën, të lexojmë pritshmërinë, të lexojmë atë që është baza e formësimit të një qasjeje strategjike elektorati.”
Por Edi Rama nuk fantazon vetëm në rrjtete sociale, këtë e bënë edhe “live” ndërsa flet për Kryesinë e PS:
“Diskutimi është lidhur me ndërtimin e strategjisë afatmesme dhe afatshkurtër, afatgjatë zgjedhjet e qershorit të 2021, si afatshkurtër gjithë procesin e brendshëm të zgjedhjeve në PS, kombinuar me gjithë procesin e planifikimit dhe administrimit të gjithë këtyre territoreve, që tani janë besuar drejtuesve socialistë në bashkitë e vendit.”
Pasi foli për strategjinë e vitit 2021, Edi Rama i dha përgjigje thirrjes së Ilir Metës, Kryeministri Rama u shpreh se zgjedhjet vendore u mbyllën më 30 qershor, dhe 13 tetori është një ditë si gjithë të tjerat:
“Zgjedhjet janë bërë në 30 qershor, jemi shumë të angazhuar për të filluar mbarë procesin e qeverisjes vendore. Kemi ngritur edhe tre këshilla vendore, dhe ky është fokusi jonë ne e kemi sfidën me problemet e vendit e të njerëzve jo me problemet e brendshme të opozitës apo të presidencës. 13 tetori është si 12 apo 14 etetori e 15 shtatori, 22 dhjetori, s’njoh një 13 tetor ndryshe, ndoshta i bie e dielë po është si gjitë të tjerat. “
Por jo gjithçka përfundon këtu. Kryeministri Edi Rama tha se është i gatshëm të ulet në tryezën e dialogut me opozitën në parlament e atë jashtë saj:
“Jemi abosolutisht të disponueshëm për t’u ulur në tryezë me të gjithë, për të diskutuar për sfidat e vendit, dhe për c’ka është e rëndësishme në funksion të rregullave të lojës. Sa i përket kushtetutës, ligjshmërisë dhe mandatit tonë qeverisës nuk i kemi për diskutim me askënd, sepse lidhen me detyrimet tona. Kemi detyrim të forcojnë kulturën e ligjit dhe jemi shumicë që kemi detyrimin të mbajmë me nder e dinjitet një mandat për të qeverisur deri në 2021.”
