Pas mohimit, PD: Mark Babani, çfarë të kujton data 4 prill 1994?!
Pas mohimit të denoncimit të bërë nga PD për Kryetarin e Bashkisë Vau i Dejës të dalë nga zgjedhjet e 30 qershorit, Mark Babani, Sekretari i Përgjithshëm i Partisë Demokratike, Gazment Bardhi, sqaroi se nëse ai dhe Prokuoria heshtin, do të veprohet si me rastet tjera dhe do të publikohet dosja e plotë. Fillimisht, si me rastet tjera, ai pyet Mark Babanin se çfarë i kujton data 4 prill 1994?!
“Ne nuk e kemi nisur nga Shkodra betejën tonë për largimin e personave me rekorde kriminale nga funksionet publike. Është një betejë e gjatë e Partisë Demokratike e kurorëzuar me miratimin, me kërkesën tonë, të ligjit për Dekriminalizimin në vitin 2015. Janë larguar deri më sot mbi 300 funksionarë publik të emëruar çuditërisht nga një krah, që është qeveria. Shkodra, Vora dhe Vau i Dejës janë vetëm tre rastet e fundit të zbuluara. Më lejoni tu kujtoj që i pyetur po nga ju, nëse unë nuk gaboj, edhe Valdrin Pjetri e mohoi fillimisht dënimin e tij për trafik droge në Itali, por më pas u detyrua ta pranojë. Ajo që unë garantoj opinionin publik është që Partia Demokratike në momentin që bën një denoncim publik ka arritur të verifikojë dhe të sigurojë të gjithë informacionin e nevojshëm që vërteton akuzën apo denoncimin që bën. Sigurisht nuk është detyrë e PD të provojë të kaluarën kriminale të funksionarit publik, kjo është detyrë e prokurorisë. Prandaj ne i jemi drejtuar Prokurorisë së Përgjithshme për të kryer një proces ligjor. Ne jemi duke pritur që ata ta bëjnë, por ne nuk do të presim pafundësisht,” tha Gazment Bardhi nga Shkodra duke rikujtuar se edhe Valdrin Pjetri fillimisht e mohoi por më pas u detyrua të pranonte ajo që garantoj është që PD në momentin që bën denoncim publik ka arritur të sigurojë të gjithë informacionin e nevojshëm që vërteton denoncimin që bën.
“Nëse ai hesht siç ka heshtur gjatë orëve të pasdites unë do i përgjigjem me dokumentacionin përkatës në ditët në vijim. Nga e hena nëse Babani nuk do të flasë se çfarë i kujton data 4 prill 1994, ne do t’ia bejmë publike shqiptarëve këtë dhe dosjen e plotë që disponojmë për të.”
Pas Valdrin Pjetrit dhe Agim Kajmakut, Partia Demokratike ka kërkuar verifikim për kryetarin e Bashkisë Vau i Dejës, Mark Babani, si i dyshuar se është ndaluar/dënuar/dëbuar në Itali dhe Maqedoni të Veriut si dhe ka fshehur edhe 3 identete të tjera.
Ndryshe, Sekretari i Përgjithshëm i Partisë Demokratike, Gazment Bardhi, si i deleguar nga Tirana mori pjesë në një mbledhje me strukturat e Partisë Demokratike Dega Shkodër.
