Pas ndalimit të mallrave serbe, bizneset kosovare me alternativa të tjera për furnizim

Bizneset kosovare kanë nisur të gjejnë alternativa të tjera për furnizim me mallra, pasi Qeveria e Kosovës, në qershor të këtij viti, kishte ndaluar importin e mallrave serbe.

Mirëpo, këto biznese thonë se nga ky vendim janë dëmtuar, pasi nuk kanë mundur të furnizohen me mallin për të cilin kishin paguar, e as nuk u janë kthyer paratë nga kompanitë me seli në Serbi.

Kompanitë me seli në Serbi kanë refuzuar t’ua kthejnë paratë bizneseve kosovare që s’kanë mundur t’ua dërgojnë mallrat, duke i adresuar te Qeveria e Kosovës që ka ndaluar importimin e tyre.

Ndërkaq, bizneset tashmë kanë filluar të furnizohen me mallra nga shtetet e tjera, ndonëse thonë se u kanë kushtuar më shtrenjtë.

Nga Qeveria e Kosovës deklaruan se janë optimistë se situata e përmirësuar do ta mundësojë largimin e masave në kufi, mirëpo shtuan se nuk duhet të nxitohen në këtë drejtim.

Ndryshe, Qeveria e Kosovës ka marrë vendim për ndalimin e kamionëve me mallra serbe më 15 qershor të këtij viti, si përgjigje ndaj arrestimit të tre policëve kosovarë nga forcat serbe.