Pas njohjes dhe marrëveshjes me Bahamas, Presidentja Osmani: Kosova ecën përpara duke fituar miq!
Pas aktit të njohjes së shtetit të Kosovës, në kryeqytetin e Komonuelthit të Bahamas, Nassau, Presidentja Vjosa Osmani firmosi me kryeministrin Philip Davis, edhe Marrëveshjen për vendosjen e marrëdhënieve diplomatike.
“Kosova ecën përpara duke fituar miq,” shprehet Presidentja e Kosovës duke vlerësuar Marrëveshjen për vendosjen e marrëdhënieve diplomatike.
“Ky akt forcon subjektivitetin ndërkombëtar të Kosovës dhe zgjeron rrethin e shteteve tona mike që besojnë në vlerat e lirisë, sovranitetit dhe bashkëpunimit,” thekson Vjosa Osmani përmes rrjetit social Facebook pas firmosjes së Marrëveshjes duke u zotuar:
“Kosova mbetet e përkushtuar ndaj partneriteteve të sinqerta, në shërbim të paqes dhe stabilitetit ndërkombëtar.”
Ndryshe, Bahamas është bërë shteti i 121-të që e njeh Kosovën si shtet të pavarur dhe sovran.
