Pas paralajmërimit të Ministrit Brendshëm, anija me mbetje të rrezikshme futet në Portin e Durrësit për shkarkim

Një ditë pas paralajmërimit të Ministrit të Brendshëm, Ervin Hoxha, sot anija Moliva me 102 konteinerë me mbetje të rrezikshme u fut për shkarkim në Portin e Durrësit.

Ankorimi i anijes “Moliva” ka nisur dhe pritet të kryhet procedura e shkarkimit të 102 konteinerëve në kalatë dhe transportimi i tyre jashtë hapësirave portuale, në një zonë të konsideruar të sigurt nga autoritetet. Vendimi është marrë pas një mbledhjeje të autoritetit portal me policinë të zhvilluar dje.

Mësohet se 102 konteinerët me mbetjet e rrezikshme do transportohen në një zonë në Porto Romano, ku do të mbahen të mbikëqyrura 24 orë siç ka kërkuar edhe Prokuroria e Durrësit. Pas vendosjes së tyre në këtë hapësirë të sigurt, pritet të procedohet me marrjen e kampionëve nga secili kontejner dhe dërgimin e tyre në një laborator të specializuar.

Ndryshe, anija me mbetjet e refuzuara nga autoritetet tailandeze mbërriti në Durrës më 28 tetor. Prej më shumë se 10 ditësh anija ndodhej në radën e portit.

Dje, pasi deputeti Agron Shehaj pyeti në seancë plenare Ministrin e Brendshëm, Ervin Hoxha, se çfarë po ndodhë me 102 konteinerët me mbetjet toskike dhe pse nuk zbatohet urdhri i Prokurorisë, ministri Hoxha tha se Prokuroria e Durrësit në bashkëpunim me Policinë e Shtetit, Agjencinë Doganore, Autoritetin Portual se po ekzekuton urdhrin dhe së shpejti do zbresin konteinerët në vend të sigurt, sipas kushteve dhe çështjeve të sigurisë, në ambientet e Durrësit, siç është kërkuar nga Prokuroria!

Kjo “së shpejti” e Ministrit të Brendshëm, Ervin Hoxha, doli të jetë mëngjesi i sotëm!