Pas përplasjes për politikën e migracionit, bie Qeveria e Holandës

Bie koalicioni qeverisës në Holandë pasi kreu i Partisë për Liri, PVV, Geert Wilders, sot vendosi të tërhiqte partinë e tij nga qeveria për shkak të mosmarrëveshjeve të thella mbi politikën e migracionit.

Geert Wilders, i cili si lider i ekstremit të djathtë doli fitues në zgjedhjet e nëntorit 2023 dhe udhëheq partinë më të madhe në parlament, kishte paralajmëruar që në fund të majit se do të shkaktonte rënien e qeverisë nëse nuk zbatohej brenda disa javësh plani i tij dhjetë pikësh për kufizimin e imigracionit.

Plani i Wilders përfshinte mbylljen e kufijve për azilkërkuesit, ndalimin e bashkimit familjar për refugjatët e njohur, mbylljen e qendrave të azilit, forcimin e kontrolleve kufitare dhe dëbimin e shtetasve me nënshtetësi të dyfishtë që janë dënuar për vepra penale.

Megjithatë, një numër ekspertësh politikë dhe ligjorë e cilësuan këtë plan si të pazbatueshëm dhe të paligjshëm, ndërsa disa vlerësuan se Wilders e kishte krijuar vetë krizën me qëllim rrëzimin e qeverisë dhe organizimin e zgjedhjeve të reja.

Pas bisedimeve të shkurtra dhe të tensionuara sot në mëngjes mes katër partive të koalicionit, Wilders deklaroi se kishte informuar Kryeministrin se PVV do të tërhiqej nga qeveria dhe se nuk mund të mbante më përgjegjësi për këtë kabinet.

Ai theksoi se kishte hyrë në koalicion për të realizuar politikën më të ashpër për azilin dhe jo për “rrënimin e Holandës”.

Tërheqja e PVV-së i jep fund një qeverisjeje që nga fillimi ishte e brishtë dhe pritet të çojë në zgjedhje të parakohshme, duke futur vendin në një periudhë të re pasigurie politike.

Në të gjithë Evropën forcat e ekstremit të djathë po përjetojnë rritje, ndërsa Holanda përgatitet të presë një Samit të rëndësishëm të NATO-s./RFE/