Pas protestës serbëve, Kurti: Le ta bëjmë Urën e Mitrovicës mbi Ibër, simbol të normalizimit!

Duke falënderuar institucionet e sigurisë që garantuan mbarëvajtjen e qetë të protestës e cila u mbajt sot në Mitrovicë të Veriut pa asnjë incident, Kryeministri i Kosovës, Albin Kurti, i bëri thirrje të gjithë qytetarëve që me hapjen e saj ta bëjnë Urën mbi lumin Ibër në Mitrovicë, simbol të normalizimit.

“Komuna e Mitrovicës së Veriut nesër prej orës 11:00, në hapësirat e Kuvendit Komunal, organizon takim dhe bashkëbisedim me qytetarë, aktivistë të shoqërisë civile dhe përfaqësues të mediave lokale me temën “Bashkëpunimi ndëretnik, këshillim komunal për siguri në bashkësi, bashkëpunimi në mes të institucioneve dhe shoqërisë civile,” tha Albin Kurti në reagimin e tij përmes rrjetit social Facebook duke ftuar bashkëqytetarët e komunitetit serb që të marrin pjesë në këtë diskutim të përbashkët në të cilin do të mund të njoftohen mbi përfitimet nga hapja e urës dhe të shprehin shqetësimet e tyre të cilat do të trajtohen nga përfaqësuesit tanë institucionalë dhe institucionet e vendit ndërsa përfundoi:

“Për shumë gjatë Ura e Mitrovicës mbi Ibër na ka mbajtur në distancë. Asaj padrejtësisht i është dhënë epiteti i ndasisë dhe marrëdhënieve jonormale. Urat na bashkojnë, e bashkë le ta bëjmë atë simbol të normalizimit.”