Pas Raportit KE/ Rama filloi të mendoj për Shqipërinë, mesazh Bashës…

Pasi mori Progres Raportin për Shqipërinë nga Ambasadori  BE në Shqipëri, Luigi Soreca, kryeministri Edi Rama foli për hapin e dytë konfirmues që është Këshilli Europian, ndërsa vazhdoi me atë që më së bënë, propagandën, duke luajtur rolin e paqësorit, të mirit, të dialogut ndonëse të gjitha i shkatërroi me dorën e tij.

Sot ai u kujtua që ky vend ka opozitë, ka lider kjo opozitë dhe me të cilin së bashku duhet të mendojnë për Shqipërinë. Jo për të mirën e këtij vendi por për të kaluar edhe hapin e dytë, Këshillin Europian, të cilin ai për tri vjet nuk e kaloi dot dhe sot flet ndryshe:

“Hapi i dytë konfirmues është Këshilli Europian, por dallimi është i qartë, në hapin e parë kriteret janë objektive, në hapin e dytë është gjykim politik dhe për këtë arsye në këtë kohë të mbetur ne do të bëjmë gjithçka që të influencojmë gjykimin politik.

Në këtë fazë jemi në kushtet kur kemi realizuar progresin e nevojshme por nuk do të të se kemi realizuar progresin për tu bere pjese, pra është një proces që vazhdon. Reforma jonë në drejtësi është unike, gjë që konfirmohet edhe nga fakti se për komisionin është një model për tu shtrirë në rajon.”

Dhe vazhdoi me spektaklin e dashamirësisë ndaj opozitës dhe liderit të saj Lulzim Basha për të cilin kishte përgatitur një mesazh të veçantë:

“Sot mos të flas për opozitën në gjuhë të huaj, pra përkthyesi mos të përkthejë asgjë për opozitën, ama kam një apel për Lulzim Bashën dhe atë pjesë e opozitës që është rrugëve, deri në vendimmarrjen e hapjes së negociatave, është mirë të mendojmë për Shqipërinë jo për partinë, për gjeneratën tjetër jo për zgjedhjet e radhës, të mos furnizojmë ata që janë të lëkundur apo në kërkim të arsyeve për të thënë jo, me pamje të gënjeshtërta që nuk pasqyrojnë realitetin nga Tirana, protestash që janë partiake dhe jo popullore,” tha Kryeministri Edi Rama edhe pse e ka të qartë se çelësin e zgjidhjes së kësaj krize politike e ka në xhep dhe jo gjetiu.

Ndërsa Ambasadori Soreca nuk ishte e qartë se kujti foli ndonëse iu drejtua palëve politike, pa u qartësua nëse flet për “Opozitën e Edi Ramës” që e mbështetë apo opozitën e vërtetë e cila falë politikës destruktive të paraardhëses së tij ajo sot është në rrugë:

“Palët politike duhet të tregojnë vullnet dhe përpjekje të përbashkët, të gjitha partitë të jenë të bashkuara dhe të lënë mënjanë ndasitë, të gjitha partitë të angazhohen në dialog per interes te te gjithëve. Unë uroj Ramën dhe qeverinë për arritjet dhe që morën rikonfirmimin për celjen e negociatave.”

Në fund, Edi Rama i pyetur se a do të pranonte propozimin e Presidentit Ilir Meta për shtyrjen e zgjedhjeve me qëllim zgjidhjen e krizës politike, Kryeministri ishte i prerë se kjo nuk do të ndodhë dhe se më 1 Qershor do të nisë fushata elektorale dhe se kjo është e pakthyeshme.

Ndryshe, Komisioni Europian sot për herë të katërt ka rekomanduar hapjen e negociatave për anëtarësim të Shqipërisë në Bashkimin Europian.

Në Raport evidentohet se Shqipëria ka avancuar në axhendën e saj europiane, por vihet re një polarizim theksuar në skenën politike.

“Polarizimi i fortë vazhdoi në sferën politike. Aktiviteti parlamentar u prek nga një bojkot i zgjatur i partive opozitare, të cilat më pas hoqën dorë nga mandatet e tyre parlamentare në Shkurt 2019. Shumica e partive opozitare vendosën që të mos regjistrohen për zgjedhjet e 30 Qershorit 2019.

Mos angazhimi i partive kryesore të opozitës ka ndikuar negativisht në komisionin bipartizan të reformës zgjedhore, pavarësisht nga përpjekjet e shumicës për të ecur përpara”, thekson raporti.

Në dokument evidentohet edhe ecuria e reformës në drejtësi, megjithatë korrupsioni mbetet një çështje shqetësuese.

“Zbatimi i reformës gjithëpërfshirëse në drejtësi ka vazhduar me progres të mirë. Janë themeluar institucionet e reja për vetëqeverisjen e gjyqësorit, duke përfaqësuar një hap vendimtar për forcimin e pavarësisë dhe llogaridhënies së gjyqësorit.

Vettingu i gjyqtarëve dhe prokurorëve ka dhënë rezultate të prekshme. Më shumë se 140 dosje janë përpunuar, duke rezultuar me 88 shkarkime/dorëheqje dhe 53 konfirmime në detyrë.

Shumica e shkarkimeve kanë të bëjnë me pasuritë e pajustifikuara. Këto rezultate konkrete dhe të besueshme kanë forcuar ndjeshëm pavarësinë, paanshmërinë, profesionalizmin dhe llogaridhënien e gjyqësorit.

Korrupsioni është mbizotërues në shumë fusha dhe mbetet një çështje shqetësuese. Shqipëria ka shënuar përmirësim në luftën kundër krimit të organizuar. Operacionet e policisë për të goditur organizatat kriminale janë intensifikuar”, thuhet në raport.

Gjetjet kryesore

Në përmbledhjen e vlerësimit që Komisioni Europian i dërgon Këshillit dhe Parlamentit europian për Shqipërinë, vihet në dukje se vendi “ka vazhduar të bëjë përparim të mirë dhe dëshmoi vendosmërinë e tij të vazhdueshme për të përparuar me agjendën e Bashkimit Europian. Shqipëria ka patur rezultate të prekshme dhe të qëndrueshme, veçanërisht lidhur me kushtet e përcaktuara në Përfundimet e Këshillit të Qershorit 2018 për hapjen e negociatave të pranimit, në një atmosferë politike të polarizuar vazhdimisht”.

Dhe lidhur me këtë situatë politike, Komisioni thekson se “partitë e opozitës, shumica prej të cilave hoqën dorë nga mandatet e tyre parlamentare në shkurt të vitit 2019, duhet të angazhohen në mënyrë konstruktive në institucionet demokratike dhe të angazhohen për një konsensus të gjerë evropian”.

Komisioni Europian thekson se “zbatimi i Reformës në Drejtësi ka vijuar në mënyrë të qëndrueshme, duke sjellë një progres të mirë në përgjithësi dhe duke hedhur themelet për forcimin e sektorit dhe konsolidimin e pavarësisë, paanshmërisë, profesionalizmit dhe llogaridhënies. Rezultate konkrete janë arritur në rivlerësimin e gjyqtarëve dhe prokurorëve. Ristrukturimi institucional i gjyqësorit ka vazhduar gjithashtu”.

Sa i përket luftës kundër korrupsionit dhe krimit të organizuar, Komisioni vëren se “kanë vijuar përpjekje të vendosura, përfshirë luftën kundër trafikimit të drogës dhe kultivimit, duke kontribuar në krijimin e një baze të qëndrueshme të dhënash në hetime proaktive, ndjekje penale dhe dënime. Vitet e fundit, Shqipëria tregoi në vijim, një angazhim të fortë për të luftuar prodhimin dhe trafikimin e kanabisit”. Po ashtu vlerësohet dhe bashkëpunimi ndërkombëtar i policisë shqiptare, veçanërisht me Shtetet anëtare të BE-së, i cili “është intensifikuar, duke çuar në një numër operacionesh të suksesshme të zbatimit të ligjit në masë të madhe dhe arrestimin dhe ndjekjen penale të krerëve të organizuar kriminalë”.

Por sipas Komisionit “krijimi i një regjistri të qëndrueshëm të hetimeve proaktive, ndjekjeve penale dhe dënimeve në luftën kundër korrupsionit në të gjitha nivelet dhe në luftën kundër krimit të organizuar mbetet një sfidë afatgjatë që vazhdon të kërkojë përpjekje të mëtejshme të përforcuara dhe të qëndrueshme nga Shqipëria, duke përfshirë bashkëpunimin operacional me Shtetet Anëtare të BE.

Në vlerësimin e tij ndërsa thekson se “në dritën e progresit të arritur dhe kushteve të vendosura unanimisht nga Këshilli në qershor 2018, Komisioni rekomandon që Këshilli të hap tani bisedimet e anëtarësimi me Shqipërinë”, duke nënvizuar se “për të mbështetur momentin e vijueshmërisë së reformave, Komisioni do të zbatonte një qasje të përforcuar për kapitujt negociues mbi gjyqësorin dhe të drejtat themelore, si dhe drejtësinë, lirinë dhe sigurinë në vend.

Shqipëria duhet të vijojë të rregjistrojë rezultate të qëndrueshme në luftën kundër korrupsionit në të gjitha nivelet dhe në luftën kundër krimit të organizuar. Një konsensus më i fortë kombëtar mbi prioritetin mbizotërues të integrimit në BE, tejkalimi i polarizimit aktual dhe demonstrimi i vullnetit politik që shkon përtej ndarjeve mes partive, është gjithashtu i nevojshëm për të mbështetur dhe konsoliduar përparimin e bërë nga vendi”.