Pas refuzimit të Sandër Lleshit, tri shqetësimet e kryeministrit Edi Rama

Pas refuzimit të Presidentit Ilir Meta, për të dekretuar Sandër Lleshin si ministrin e ri të Brendshëm, u prit reagimi i ashpër i kryeministrit Edi Rama i cili merret edhe me secilin kundërshtar që i del duke i komentuar në Facebook. Në “mungesë” të reagimi të Edi Ramës, Zyra e tij e propagandës u kujdes duke përdorë mediat ta shfryjë opinionin me tri shqetësime, secila më e ndyrë se tjetra.

Fillimisht, Zyra e propagandës së Edi Ramës u kujdes për ta njollosur Presidentin i cili guxoi ta kthen mbrapsht propozimin e kryeministrit për Ministër të Brendshëm. U tha në media se Presidenti shkeli Kushtetutën por nuk u tha se pse Edi Rama e la vendin pa Gjykatë Kushtetuese dhe me President Ilir Meta, të dyja këto zgjidhje të vetë Ramës.

Për qytetarët që nuk kanë ndjeshmëri ndaj Kushtetuës u shpik Plani B. Burime pranë mazhorancës, raportojnë mediat se kryeministri nuk do të propozojë një kandidaturë të re, për të zëvendësuar Fatmir Xhafën, pas mosdekretimit të Lleshit si ministër, por Rama pritet të emërojë si zëvendësministër të Brendshëm, Sandër Lleshin. Me këtë emërim, Sandër Lleshi do të ketë atributet për të drejtuar këtë dikaster shumë të rëndësishëm.

Nuk është se këtë strategji nuk mund ta aplikoj Edi Rama por nuk është e qartë se pse i duhet gjithë kjo ngatërresë kur edhe si Këshilltar i kryeministrit për Siguri Kombëtare, Sandër Lleshi mund ta bëjë këtë punë, gjë të cilën ia pranoi edhe Fevziut kur tha se ai praktikisht ishte shef i ministrit të Brendshëm.

Varianti i tretë i shqetësimit të Edi Ramës pas vendimit të Presidentit Ilir Meta për mos dekretimin e Sandër Lleshit, është më shumë komedi se sa shqetësim.

Kryeministri Edi Rama, raportojnë disa media që mundohen të na bindin se Edi Rama na qenka bërë institucional, se i  është drejtuar me një mesazh deputetëve të PS, ku kërkon nga ata
që të mos bëhet asnjë koment për vendimin e Metës.

“Lutem asnje lloj komenti askush per vendimin e Presidentit! Ne jemi shumica dhe ne kemi detyren t’i dalim Zot njerezve, vendit,
Kushtetutes me maturi dhe vendosmeri. Politika eshte shah, mos e harroni”, ka qenë ky mesazhi që Rama u ka derguar të tijëve,” citohet mesazhi i njeriut i cili është kampion si për të mos i dal Zot njerëzve dhe vendit, ashtu edhe Kushtetutës!

Kush dhe si e nisi mesazhin nuk raportohet, ndërkohë deri sa pritet suksesi i Zyrës së propoagandës së Edi Ramës me tri shqetësimet, ky i fundit në profilin e tij në Facebook bënë me dije se është në një koncert në piano në hapsirën e e tij në kryeministri që e pagëzoi, COD.

“ERTV Live: Gile Bae, koncert në piano, në COD, Kryeministri”