Pas rënies së Damaskut, Kremlini: Putin ia miratoi Assadit azilin politik

Kremlini ka konfirmuar se vetë presidenti rus, Vladimir Putin, ia ka miratuar azilin politik presidentit të rrëzuar sirian, Bashar al Assad.

Zëdhënësi i Kremlinit, Dmitry Peskov, tha sot në Moskë se teksa Putin e ka marrë vendimin personalisht për t’ia miratuar azilin Assadit dhe familjes së tij, nuk ka detyrime për të dhënë më shumë detaje, raporton RFE.

“Vendime të tilla nuk mund të merren pa krerë shtetesh. Ka qenë vendimi i Putinit,” tha Peskov duke shtuar:

“Nuk kam asgjë për t’ju thënë për vendndodhjen e Assadit,” tha Peskov.

Agjencia ruse e lajmeve, TASS, e ka cituar një zyrtar të Ambasadës së Sirisë në Moskë, të ketë thënë se Assadi është në kryeqytetin rus. Këto raportime nuk janë konfirmuar.

Rusia, aleate për kohë të gjatë e Assadit, ka thënë se ai “ka vendosur të dorëhiqet pas negociatave me një numër pjesëmarrësish në konfliktin e armatosur dhe e ka lënë zyrën, duke dhënë udhëzime për transferim paqësor të pushtetit”.

“Rusia nuk ka marrë pjesë në këto negociata,” tha Ministria e Jashtme ruse.

Në Damask dhe qytete tjera siriane, njerëzit kanë dalë në rrugë për të festuar rrëzimin e regjimit të Assadit, kanë rrëzuar statuja dhe kanë plaçkitur ndërtesa qeveritare, përfshirë rezidencën e Assadit.

Kryeministri i Sirisë, Mohammad Ghazi al Jalali, tha përmes një video-mesazhi se Qeveria e tij është e gatshme të bashkëpunojë me çdo udhëheqësi të zgjedhur nga njerëzit”.

Ai është parë duke u larguar dje nga shtëpia e tij më 8 dhjetor, në shoqëri të burrave të armatosur, pas raportimeve se do të takojë udhëheqësinë e grupit rebel sunit, Hayat Tahrir al Sham, HTS, e cila e ka udhëhequr ofensivën kundër regjimit të Assadit.

HTS është organizatë e shpallur terroriste nga Shtetet e Bashkuara dhe Bashkimi Evropian. Në vitet e fundit, ky grup militant islamist, i ka prishur lidhjet me Al-Kaidën, dhe ka tentuar të prezantohet si alternativë pragmatike ndaj Qeverisë siriane. Megjithatë, ka shqetësime për abuzime që ka kryer ky grup, si dhe për lidhjet me grupe tjera terroriste.

Ndryshe, regjimi i Bashar al Assad është rrëzuar në fundjavë, pas një ofensive të shpejtë të rebelëve të udhëhequr nga islamistët.

Këshilli i Sigurimit i Kombeve të Bashkuara, raporton RFE, pritet të mbajë një takim urgjent për situatën në Siri, pas rrëzimit të Assadit, i cili ka ikur në Rusi me familjen e tij, pas arritjes së rebelëve në Damask.

Përfaqësuesit rusë janë shprehur se takimi urgjent do të mbahet me dyer të mbyllura.