Pas shantazhit, Edi Rama: Ne do të marrim pjesë në mbledhjen e Këshillit të BE-së!

Pas shantazhit që i bëri dje Bashkimit Europian, shefi i Ballkanit të Hapur, Aleksandar Vuçiç, duke vënë në pikëpyetje pjesëmarrjen e tij, dhe Kryeministrave të Shqipërisë dhe Maqedonisë së Veriut në Samitin e BE për Ballkanin që zhvillohet nesër, sot Edi Rama pasi urdhëroi mediat të trumbetojnë mbështetjen e opozitës bullgare për heqjen e vetos, bëri të ditur se do të marrë pjesë në këtë Samit.

“Sapo dëgjova që diçka po lëviz sot në Bullgari. Shumë herët për të qenë optimist dhe shumë pak për të ndryshuar pjesën e fjalimit të nesërm ku Bullgaria kritikohet si një vend që ka rrëmbyer dy vende të NATO-s, ndërkohë që ka një luftë të nxehtë në kufirin e Evropës!” tha Edi Rama përmes rrjetit social Twitter duke respektuar fjalën e opozitës bullgare por jo edhe të asaj shqiptare, vetëm për të dalë nga situata që krijoi dje me kriminelin serb Aleksandar Vuçiç dhe shtoi:

“Ne do të marrim pjesë në mbledhjen e Këshillit të BE-së. Nuk do të ketë shumë për të dëgjuar për ne, por ne do të kërkojmë të dëgjohemi për idenë e një Komuniteti të Ri Politik Evropian që ne mbështesim, për Ballkanin e Hapur që çon përpara frymën e Evropës dhe për rrëmbimin tonë nga Bullgaria që shkatërron atë.”

Ndryshe, dje Presidenti i Serbisë, Aleksandar Vuçiç, pas bisedës online që zhvilloj me Kryeministrin e Shqipërisë mbi Samitin e ardhshëm për Ballkanin Perëndimor në Bruksel, që organizohet nga Presidenti i Këshillit Evropian, Charles Michel, tha se nesër në mesditë do të publikojmë vendimin nëse do të marrim pjesë në këtë takim ose jo!  

Ndërkohë, sot, lideri i partisë opozitare bullgare, GERB, Bojko Borisov, i ka bërë thirrje Qeverisë së kryeministrit Kirill Petkov, që të paraqesë propozimin në Parlament, që të miratohet nga shumica e ligjvënësve bullgarë propozimin francez për zgjidhjen e kontestit me Maqedoninë e Veriut dhe zhbllokimin e procesit të integrimit evropian të këtij vendi.