Pas Shkodrës dhe Vorës, Paralajmërimi, Basha: PD po shqyrton…
Jo vetëm Valdrin Pjetri dhe Agim Kajmaku! Kryetari i Partisë Demokratike, Lulzim Basha, pas takimit me Nënkryetaren e Grupit Parlamentar CDU/CSU për Europën, Katja Leikert, ka bërë të ditur se PD po shqyrton dhjetra raste të tjerë që janë në shkelje të ligjit të dekriminalizimit, persona të afërt me Partinë Socialiste, jo vetëm kryebashkiakë të kandiduar nga Kryeministri Edi Rama.
“PD po shqyrton të gjitha rastet për dhjetra individë me rekorde të garuar nga Rama, të kandiduar, janë pjesë e një procesi antikushtetues,” ndërsa për rastin e Jorgo Kajmakut i cili u denoncua dje ai u shprehë:
“Dua të dënoj heshtjen e Edi Ramës nga 24 orë që PD ka publikuar dokumentet zyrtare që provojnë se Kajmaku është në shkelje të ligjit të dekriminalizimit dhe duhet sot të ishte marrë i pandehur nga prokuroria, dua po kështu të dënoj heshtjen e prokurorisë e cila si shtojcë e Ramës sa herë i duhet Ramës bën lëvizje propagandistike, pse hesht Arta Marku?” tha Lulzim Basha duke shtuar se këto heshtje tregojnë se Kajmaku u kandidua me dijeni dhe bekimin e Ramës kur ky i fundit dinte këto të vërteta që sot i di cdo shqiptar.
Lideri i opozitës edhe sot përsëriti se zgjidhja e krizës kalon vetëm përmes zgjedhjeve të lira e të ndershme, pa Ramën kryeministër dhe me një qeveri tranzitore që t’i garantojë zgjedhjet.
“Mali i provave është bërë më i lartë se mali i Dajtit. Zgjidhja e kësaj krizë kalon mes zgjedhjeve të lira e të ndershme, një qeveri tranzitore pa Ramën kryeministër dhe zgjedhje të parakohshme në një ditë më ato lokalet. PD dhe opozita e bashkuar është në komunikim të vazhdueshëm me ndërkombëtarët, pjesë e këtij takimi ishte dhe takimi i sotëm me Katja Leikert, nënkryetare e grupit parlamentar CDU/CSU për Europën,” tha Basha duke u shprehur qartë se opozita dhe PD janë kundër zgjidhjeve artificiale për karriget dhe pushtetin, dhe angazhohen për zgjidhje përmes garancive që do pengojnë çdo qeveri të ardhshme të bjerë në të njëjtin batak.
I pyetur për aksionin e shtatorit, Kryetari i Partisë Demokratike tha se ai do të jetë vijim i aksionit të pandërprerë të opozitës.
“Së bashku me shqiptarët, opozita vec protestave që do të jenë edhe më të mëdha e të fuqishme, do të fokusohet në zgjidhjet që do t’u ofrojmë shqiptarëve, në rrafshin e përditshmërisë. Po punojmë në kuadër të programit tonë për marrëveshje me grupet e interesit, dhe nga ana tjetër për platformën për Shqipërinë si Evropa,” tha Kryetari i Partisë DEmokratike, Lulzim Basha, duke pëefunduar:
“Jemi gati që bashkë me shumicën e shqiptarëve të dëshmojmë kapacitetet dhe vendosmërinë tonë për t’u dhenë fund problemeve që kanë bllokuar perspektivën evropiane të vendit”.
