Pas shpalljes së gjendjes së jashtëzakonshme, Basha:Më mirë vonë se sa hiç!

Pas shpalljes së gjendjes së jashtëzakonshme nga ana e Kryeministrit Edi Rama, Kryetari i Partisë Demokratike, Lulzim Basha, me rastin e vizitës në Thumanë tha sot se tani është momenti që gjendja e jashtëzakonshme të mos mbetet në letër.

“Sot u shpall gjendja e jashtëzakonshme. Më mirë vonë sesa hiç dhe tani është momenti që gjendja e jashtëzakonshme të mos mbetet në letër, llafe dhe shfaqje. Diçka e vogël të ndodh dhe të turbullon gjithë ditën, në këtë rast qeveria duhet të marrë masa që të jetë pranë tyre,” Lulzim Basha duke shtuar se tani familjet duhet të akomodohen në apartamente dhe të ndihmohen financiarisht për një periudhë 6 mujore.

“Prioritetet janë të parat kërkimi dhe nxjerrja e viktimave nga rrënojat dhe për këtë duhet një mbështetje totale. Dhjetëra e qindra familje kanë nevojë për mbështetje. Natën e parë është e kuptueshme, por nuk mund të qëndrojnë në çadra. Moti dhe kushtet janë të papranueshme. Menjëherë duhet bërë vendosja e tyre në apartamente dhe mbështetja e tyre për një afat 6 mujor, që gjendja e jashtëzakonshme i jep mundësi qeverisë që të alokojë fonde buxhetore që ta bëjë këtë të mundur.”