Pas shpërthimit në Zubin Potok, Osmani takon ambasadorët e Quintit dhe komandantin e KFOR-it
Një ditë pas sulmit terrorist që dëmtoi kanalin e ujit të Ibër-Lepencit në veri, Presidentja e Kosovës, Vjosa Osmani, ka zhvilluar një takim me ambasadorët e vendeve të Quintit dhe ambasadorin e BE-së, ku është biseduar mbi zhvillimet e fundit në Kosovë
“Ky ishte një sulm terrorist ndaj infrastrukturës jetike të Kosovës, i cili e cenon sigurinë kombëtare të Kosovës,” tha Presidentja Osmani në takim me ambasadorët ku u diskutua për reagimin e institucioneve përgjegjëse karshi kësaj situate, me ç’rast si presidentja Osmani ashtu dhe ambasadorët e Quintit i kanë bërë vlerësimin më të lartë për menaxhimin dhe punën e bërë.
Me këtë rast, Presidentja e Kosovës, Vjosa Osmani i bëri thirrje bashkësisë ndërkombëtare ta dënojë sulmin dhe të qëndrojë e bashkuar kundër çdo përpjekjeje për të minuar paqen dhe sigurinë në Kosovë.
Përveç se në takim me ambasadorët e shteteve të Quintit, Shtetet e Bashkuara, Franca, Gjermania, Italia dhe Mbretëria e Bashkuar, Presidentja e Kosovës edhe në takim me komandantin e KFOR-it, Enrico Barduanin, tha se sulmi terrorist ndaj infrastrukturës vitale dëshmon qëllimet e Serbisë për destablizimin e Kosovës dhe gjithë rajonit.
Edhe para këtij takimi, KFOR-i dënoi sulmin në kanalin e Ibër-Lepencit, dhe tha se është e rëndësishme gjetja e fakteve dhe sjellja para drejtësisë e personave përgjegjës.
Nga e premtja në mbrëmje kur ndodhi sulmi, misioni i NATO-s në Kosovë tha se ka ofruar sigurinë përreth kanalit të ujit dhe zonave në afërsi, si dhe ka ndihmuar institucionet e Kosovës me logjistikë dhe mjete të tjera.
Ndërkohë autoritetet e Kosovës e kanë akuzuar Serbinë se qëndron pas këtij sulmi, gjë që është mohuar nga Beogradi zyrtar.
Ndryshe, Presidenti i Serbisë, Aleksandar Vuçiç, foli për sulmin terrorist të premtes duke shmangur tre sulmet terroriste që kanë ndodhur gjatë 72 orëve të fundit në Veri të Kosovës, duke filluar me sulmin me granatë dore të Komisiaritit të Policisë, godinës së Komunës Zveçan, dhe duke arritur kulmin me sulmin terrorist ndaj rrjetit të ujësjellësit të Ibër-Lepencit në fshatin Varagë të Zubin-Potokut.
