Pas skandalit në Austri, kundërshtari i madh i Kosovës jep dorëheqje

Pas skandalit me videon, Zv/kancelari austriak, Heinz-Christian Strache dha sot dorëheqje. Kancelari austriak, Sebastian Kurz, i partisë konservatore, ÖVP, e pranoi dorëheqjen, raporton DW ndërsa kishte përjashtuar mundësinë e mëtejshme të bashkëpunimit me zëvendëskancalerin austriak dhe kreun e partisë së lirë, FPÖ, Heinz-Christian Strache.

Dorëheqja e 49 vjeçarit shihej si e pritshme. Strache dorëzon edhe postin e kryetarit të partisë, FPÖ.

Në zgjedhjet e fundit FPÖ arriti 26% të votave. Pyetja që tashmë shtrohet është nëse kancelari Kurz do të vazhdojë koalicionin me FPÖ apo do të kërkojë zgjedhje të reja. Si pasues i mundshëm konsiderohet kandidati i dikurshëm për president nga FPÖ, Norbert Hofer.

Heinz-Christian Stache ndryshe njihet edhe si politikan ekstremist me qëndrime kundër Kosovës.

Ndryshe, Austria u trondit nga skandali i një videoje e cila ishte realizuar nga viti 2017 ku Heinz-Christian Strache tregohet i gatshëm që t’i japë një oligarkeje ruse mbështetje për tendera publikë, në rast se FPÖ do të ishte pjesë e qeverisë pas zgjedhjeve; Kjo në këmbim të mbështetjes financiare. Videoja e shpërndarë nga “Spiegel” dhe “Süddeutsche Zeitung” bën fjalë për një ide të oligarkes, për të blerë gazetën austriake me tirazhin më të lartë “Kronen Zeitung”, që të mbështesë FPÖ para zgjedhjeve. Prokuroria ka filluar hetimet.