Pas sulmit ndaj Ambasadës së Malit Zi në Beograd, AP: Vuçiç po i hedhë benzinë zjarrit!

Ideatori i madh i projektit paqësor, Mini Shengeni, Presidenti i Serbisë, Aleksandar Vuçiç sot pas sulmit ndaj Ambasadës së Malit të Zi në Beograd u kthye në identitet, duke akuzuar të gjithë joserbët si në vitet ’90-të në Kroaci dhe Bosnje kur kërkonte edhe kokat e tyre.

Sot Ambasadori i Serbisë në Podgoricë, Vladimir Bozhoviç, refuzoi të marrë notën e protestës në Ministrinë e Jashtme të Malit të Zi, ku u ftua pas incidentit, por reagimi i shefit të tij, Ivica Daçiç dhe Presidentit të Serbisë, Aleksandar Vuçiç tregojnë se është shteti serb ai që qëndron prapa, jo vetëm sulmit, por edhe protestave që po zhvillohen në Mal të Zi kundër Ligjit për liritë fetare.

Sjellja e Presidentit të Serbisë, Aleksandar Vuçiç, kur në kulmin e tensioneve planifikon një vizitë në Mal të Zi pa informuar fare autoritetet shtetërore, për Agjencinë amerikane të lajmeve Associated Press, AP, është “hedhje benzinë zjarrit”.

Vuçiç, shkruan AP, e ka akuzuar Kryeministrin e Malit të Zi, Dushko Markoviç, për “gënjeshtër famëkeqe” pas ai deklaroi se Ambasada nuk ishte e mbrojtur.

“Nuk kërcënojmë ne pavarësinë e Malit të Zi, por ju kërcënoni përmendoret e shenjta të cilat nuk ju takojën juve,” citon fjalët e Vuçiçit, AP.

Agjencia e lajmeve Associated Press kujton se Ministria e Punëve të Jashtme e Malit të Zi ka ftuar Ambasadorin e Serbisë për ti dorëzuar notën e protestës për shkak të “sulmit të paudhë nacionalist” ndaj flamurit dhe Ambasadës së Malit të Zi, dhe është Ministri i Jashtëm i Serbisë, Ivica Daçiç, raporton AP, ai cili ka sqaruar se Ambasadori e ka refuzuar “sepse kjo është përpjekje e Malit të Zi që fajin për krizën në mes të dy shteteve t’ia hedhë vetëm Beogradit”.

Ndërkohë Ivica Daçiç përveç se ka akuzuar Podgoricën zyrtare, përmes Televizionit publik të Serbisë, RTS, e ka bërë të qartë edhe qëndrimin e Beogradit kundër Ligjit për liritë fetare në Mal të Zi sepse, sipas tij, është kundër të drejtave dhe lirive të popullit serb dhe Kishës Ortodokse Serbe në Mal të Zi.

Dhe jo vetëm kaq! Ai kërcënoi Podgoricën zyrtare duke i bërë të qartë se Beogradi ka të drejtën legjitime dhe detyrimin të flas për serbët në Mal të Zi, sepse, thotë ai, janë 29 për qind e popullsisë në këtë shtet.

Por megalomania e Daçiçit nuk përfundon këtu dhe jo më kot ishte zëdhënës i Milosheviçit. Duke folur në emër të Qeverisë së Serbisë, ai thotë se Ligji për liritë fetare në Mal të Zi është miratuar përkundër kundërshtimit të popullit serb dhe Kishës Ortodokse Serbe sepse mund të kërcënoj vendet e shenjta ortodokse serbe edhe pse dihet që nga dita e parë e krijimit të këtij shteti, ishte Beogradi zyrtar ai që ishte kundër pavarësisë së Malit të Zi, organizoi akte terroriste kundër shtetit malazez madje në bashkëpunim me shërbimin sekret rus edhe vrasjen dhe puçin shtetëror në Podgoricë, të cilat nuk u realizuan fal ndihmës amerikane.

Ndërsa Presidenti i Serbisë, Aleksandar Vuçiç që vlerëson se Ambasada e Malit të Zi ishte e mbrojtur por është gjuajtur me mjete piroteknike, që për kutin serb nuk është sulm, paralajmëroi nesër një takim me Kryepeshkopin e Serbisë Irinej, kur dhe do ta bëjë publike vendimin nëse do të shkoj në Mal të Zi për natën e Krishtlindjeve Orotodokse Serbe, dhe përsëriti se nuk ka arsye të lajmëroi autoritetet malazeze kur qëllimi i vizitës është fetar. Për të gjithë ata që njohin zhvillimet në Kosovë dhe Kroaci, e kanë të qartë se kemi të bëjmë me vizitë kriminale sa herë që Beogradi zyrtar dhe Vuçiç thonë “vizitë fetare”.