Pas sulmit në Kabul, Presidenti Trump anulon bisedimet për paqe me Afganistanin

Presidenti i Shteteve të Bashkuara, Donald Trump, tha se ka anuluar një takim në Washington me liderët e talibanëve dhe presidentin afgan, Ashraf Ghani, pas një sulmi me bombë në Kabul që la të vdekur 12 persona, duke përfshirë edhe një ushtar amerikan.

Presidenti Trump përmes rrjetit social Twitter tha se kishte planifikuar në heshtje të zhvillojë bisedime me të dyja palët.

“Nëse ata nuk mund të pajtohen për armë-pushim gjatë këtyre bisedimeve shumë të rëndësishme për paqe, si dhe janë në gjendje të vrasin 12 persona të pafajshëm, atëherë nuk kanë fuqi për të negociuar një marrëveshje të mirëfilltë,” tha Presidenti Trump.

Presidenti Trump tha se po bënë përpjekje t’i japë fund konfliktit 18 vjeçar në Afganistan si dhe të tërheq trupat amerikane, për të realizuar premtimin që kishte dhënë gjatë fushatës më 2016.

Shtetet e Bashkuara dhe talibanët, që nga shtatori i vitit të kaluar, kanë mbajtur tetë raunde bisedimesh për paqe. Të dyja palët kanë njoftuar për përparim në bisedimet për një marrëveshje të mundshme. SHBA ka premtuar se mund të tërheqë trupat, nëse talibanët nuk lejojnë që Afganistani të përdoret si bazë për terrorizmin, raporton RFE.

Talibanët kanë refuzuar të negociojnë drejtpërdrejt me qeverinë e mbështetur nga Perëndimi në Kabul, duke e quajtur atë të paligjshme.