Pas sulmit të SHBA ndaj Venezuelës, çmimet e naftës mbeten të qëndrueshme

Investitorët peshojnë ndërprerjet afatshkurtra të eksporteve nga vendi i Amerikës së Jugut kundrejt potencialit për rritje të prodhimit të naftës, shkruan Financial Times.

Çmimet e naftës shënuan pak ndryshime pasi operacioni i SHBA-së për të rrëzuar presidentin e Venezuelës, Nicolás Maduro, krijoi pasiguri mbi të ardhmen e rezervave më të mëdha të naftës së papërpunuar në botë.

Nafta Brent, treguesi ndërkombëtar i çmimeve të naftës, u tregtua e pandryshuar gjatë ditës në 60.77 dollarë për fuçi, pasi më herët kishte rënë nën nivelin 60 dollarë. Çmimet e West Texas Intermediate, WTI, treguesi amerikan, u rritën me 0.1 për qind në 57.40 dollarë për fuçi.

Venezuela prodhon më pak se 1 për qind të prodhimit global të naftës, me eksportet e kufizuara nga sanksionet amerikane dhe një bllokadë detare. Megjithatë, vendi zotëron rreth 17 për qind të rezervave globale të naftës së papërpunuar, sipas Administratës Amerikane të Informacionit për Energjinë, EIA, çka i jep potencialin për të rritur ndjeshëm furnizimin.

Pavarësisht lëvizjeve të kufizuara të çmimeve, aksionet e Chevron, ConocoPhillips dhe ExxonMobil u rritën ndjeshëm në tregtimin para hapjes së bursës, pasi presidenti amerikan Donald Trump deklaroi se kompani të mëdha amerikane të naftës do të investonin në Venezuelë.

Aksionet e Chevron u rritën pothuajse me 7.8 për qind, ConocoPhillips me 7.5 për qind, ndërsa të ExxonMobil u rritën me 4 për qind. Chevron tashmë operon në Venezuelë në bazë të një licence të posaçme të dhënë nga administrata Trump.

Tregtarët tani duhet të vlerësojnë ndikimin që ndërhyrja amerikane do të ketë në tregun e naftës, në një moment kur analistët paralajmërojnë për një tepricë të afërt të furnizimit me naftë.

Amrita Sen, themeluese e kompanisë konsulente Energy Aspects, tha se supozimi mbizotërues ishte se ndërhyrja e SHBA-së do të ushtronte presion ulës mbi çmimet, pasi tregjet presin që në të ardhmen të rikthehen në treg fuçi shtesë nga Venezuela.

“Njerëzit do të supozojnë se në afatmesëm do të ketë shumë më tepër naftë,” u shpreh ajo.

Saul Kavonic, analist në MST Financial, tha se tregtarët ishin lodhur nga “konsideratat e rrezikut gjeopolitik që nuk përkthehen në ndërprerje reale të furnizimit”.

Shumica e analistëve presin që çmimet e naftës të vijojnë rënien në pjesën e hershme të këtij viti, pas një rënieje prej 20 për qind në vitin 2025, që e ka çuar Brent-in në nivelin aktual pak mbi 60 dollarë për fuçi. “Tregu është po aq pesimist sa ka qenë të paktën në një dekadë,” tha Sen, duke iu referuar niveleve rekord të pozicioneve të shkurtra në Brent dhe niveleve historikisht të ulëta të pozicioneve të gjata në WTI.

Edhe pse në afatmesëm mund të ketë më shumë naftë nga Venezuela, rritje domethënëse në afatshkurtër nuk pritet, shtoi ajo. “Eksportet tashmë janë përgjysmuar dhe bllokada dhe sanksionet mbeten në fuqi, ndaj kemi një situatë ku asgjë nuk ka ndryshuar dhe nuk ka naftë shtesë.”

Pavarësisht trazirave në Venezuelë, OPEC+ nuk sinjalizoi ndonjë ndryshim të menjëhershëm strategjie në përditësimin e planifikuar të së dielës. Tetë anëtarë të grupit të prodhuesve, përfshirë Arabinë Saudite, Rusinë dhe Emiratet e Bashkuara Arabe, u takuan shkurtimisht dhe ranë dakord të ruajnë pezullimin e rritjes së prodhimit të paktën deri në prill.

Në afatshkurtër, prodhimi i naftës në Venezuelë mund të bjerë edhe më tej. Bllokada ka kufizuar ndjeshëm importet e lëndëve të nevojshme për përzierjen e naftës së rëndë të vendit për eksport, duke ngushtuar kapacitetet operative. Reuters raportoi të dielën se kompania shtetërore Petróleos de Venezuela (PDVSA) u kishte kërkuar disa partnerëve në ndërmarrjet e përbashkëta të ulnin prodhimin.

“Kemi identifikuar të paktën 200,000 deri në 300,000 fuçi në ditë që tashmë janë nxjerrë jashtë prodhimit, dhe mund të jenë edhe më shumë,” tha Sen. “Në afat shumë të shkurtër, rreziku është që të humbasim edhe më shumë prodhim.”

Ndërkohë, kontratat e së ardhmes të tregut amerikan të aksioneve shënuan rritje. Kontratat e së ardhmes të S&P 500 u rritën me 0.3 për qind, ndërsa ato të Nasdaq 100 u rritën me 0.6 për qind. Çmimet e arit u rritën me 2.4 për qind në 4,434 dollarë për ons. Dollari u forcua me 0.2 për qind kundrejt një shporte monedhash.

“Tregjet e riskut në afatshkurtër, zakonisht votojnë mbi faktin nëse një skenar më i keq po bëhet më shumë apo më pak i mundshëm,” tha Edward Al-Hussainy, menaxher portofoli në Columbia Threadneedle. “Në rastin e Venezuelës, duket se kemi shmangur një luftë në shkallë të plotë dhe kjo mund të jetë e mjaftueshme për të mbështetur hapjen e tregjeve financiare këtë javë.”/Financial Time/Monitor/