Pas takimeve me liderët politik, Osmani: Brenda afatit, të arrihet pajtim për konstituimin e Parlamentit

Pas takimeve konsultative me liderët e partive parlamentare, Vetëvendosje, PDK, LDK dhe AAK, Presidentja e Kosovës, Vjosa Osmani, u ka bërë thirrje që në frymën e bashkëpunimit dhe mirëbesimit, si dhe në dobi të interesit qytetar dhe shtetëror, sa më shpejt, por gjithsesi brenda afatit 30- ditor të përcaktuar nga Gjykata Kushtetuese, të arrihet një pajtim rreth rrugës përpara për konstituimin e Parlamentit.

“Moskonstituimi i institucioneve të reja të dala nga vullneti i qytetarëve i shprehur më 9 shkurt të këtij viti dëmton vlerat demokratike si dhe interesat e shtetit tonë, pengon një sërë përftimesh shtetërore që janë në interes të qytetarëve dhe zvogëlon besimin qytetar në institucione,” thekson Presidentja Vjosa Osmani pas takimeve me Kryeministrin në detyrë dhe kryetarin e Vetëvendosjes, Albin Kurti, kryetarin e Partisë Demokratike të Kosovës, Memli Krasniqi, kryetarin e Lidhjes Demokratike të Kosovës, Lumir Abdixhiku dhe kryetarin e Aleancës për Ardhmërinë e Kosovës, Ramush Haradinaj, ku ata paraqitë qëndrimet e tyre lidhur me procesin e konstituimit të Parlamentit si dhe interpretimet e tyre për Aktgjykimin e Gjykatës Kushtetuese.

Ndryshe, Presidentja e Kosovës, Vjosa Osmani sot ka filluar një cikël të ri konsultimesh lidhur me konstituimin e Parlamentit, në dritën e Aktgjykimit të Gjykatës Kushtetuese në rastin Nr.KO 124/25.

Takime konsultative me partitë e tjera të përfaqësuara në Parlament, Presidentja Osmani do të vazhdojë gjatë ditëve në vijim, në rolin e saj si garantuese e funksionimit kushtetues dhe përfaqësuese e unitetit të popullit në Republikën e Kosovës.