Pas takimeve në Këshillin e Evropës, Berisha: u shkrinë të gjitha mashtrimet e Edi Ramës!

Pas takimeve që zhvilloi në Asamblenë Parlamentare të KiE në Strasburg, Kryetari i Partisë Demokratike, Sali Berisha, tha se ishte zëri i shqiptarëve në Këshillin e Europës pas atij skandali ndërkombëtar të Edi Ramës, aty ku u shkrinë të gjitha mashtrimet dhe dezinformimet e Ramës dhe veglave të tij.

“U ktheva nga një udhëtim, qëndrim dhe vizitë njëditore në Strasburg, i ftuar nga grupi i Partisë Popullore në Asamblenë Parlamentare të Këshillit të Europës, por edhe grupi i demokratëve konservatorë në këtë asamble, për të shkëmbyer mendime për gjendjen në Shqipëri.
Në këtë vizitë, u prita në një takim të veçantë nga Presidenti i Asamblesë Parlamentare të Këshillit të Europës, Rusopulos.

U takova në takime të veçanta me delegacionin parlamentar në këtë asamble të Italisë, Suedisë, Greqisë.
Zhvillova një takim të veçantë në komitetin prestigjioz të antitorturës në këtë institucion.
Takova zyrtarë dhe miq të shumtë.
Në karrierën time politike, ky institucion është institucioni i parë që unë kam vizituar si President Republike. Këshilli i Europës është institucioni më i vjetër evropian pas Luftës së Dytë Botërore, i cili në themel ka zgjedhjet e lira, liritë dhe të drejtat e qytetarëve evropiane. Me këtë institucion kam pasur marrëdhënie intensive, qoftë si president apo kryeministër, qoftë si kryetar i partisë më të madhe opozitare.
Këshilli i Europës me bankën e tij dhe me ekspertizat e jashtëzakonshme i ka dhënë Shqipërisë një ndihmë shumë ët madhe financiare, teknike në betejën kundër korrupsionit, në të gjitha problemet e autonomisë lokale dhe rajonale, në çështjet e demokracisë. Ai këshill, me iniciativën e Sali Berishës ka votuar rezoluta kundër regjimit socialist në kohën kur isha në opozitë.
Kësaj here, pas 13 vitesh, unë përsëri aty isha në shtëpinë time dhe pata një pritje shumë miqësore dhe të përzemërt. Ishte një kënaqësi e madhe që unë dje isha zëri i të gjithë shqiptarëve në atë institucion, zë që ka munguar kaq e kaq vite.
Por duhet t’u them këtu, ishte një kënaqësi shumë e veçantë, pas të themi pothuajse skandalit ndërkombëtar të Edi Ramës, çka kishte detyruar në një akt të pashembullt me një lider evropian, kishte detyruar drejtuesit e këtij institucioni të anulojnë darkën zyrtare të parashikuar për kryeministrin e Shqipërisë, pasi ai nuk ishte i denjë për këtë darkë.
Nuk ishte i denjë, ia anuluan darkën.
Nuk po ndalem në reagimet e tij pas anulimit të darkës që janë një turp i madh për të mos thënë dhe gjer më shumë.
Por tani po informoj shqiptarët se unë aty isha zëri i tyre, zë që u paraqiti grupeve parlamentare të vërtetat mjerisht pak të njohura mbi regjimin e Edi Ramës, narkoshtetin dhe narkodiktaturën në Shqipëri.
Mendoj se ishte shumë e dobishme dhe e domosdoshme që parlamentaret e grupeve kryesore parlamentare siç është grupi i PPE në këtë institucion, të mësonin me dokumente dhe fakte të pakundërshtueshme, të vërtetat e narkoshtetit të parë dhe të vetëm në Europë, të cilat u ndoqën me interes shumë të madh,” tha Sali Berisha duke folur dhe për informimin në Komitetin Antitorturë.

“Unë informova audiencën e nderuar të parlamentarëve nga e gjithë Europa se Edi Rama arrestoi në vit elektoral, apo vuri në proces penal, tre liderët e partive kryesore opozitare dhe tre të tjerëve u mori mandatet, i mban në arrest shtëpie apo i mban në burg. Një vend të dytë si Shqipëria nuk ka në këto shkelje.
Shqipëria tejkalonte Bjellorusinë e Lukashenkos dhe ngjiste diku me një vend si Tunizia apo më keq.
Në këto takime bëra historikun e shkurtër të kanabizimit të Shqipërisë, me të cilat u hodhën themelet e narkoshtetit. Hapjen e Shqipërisë ndaj kokainës.
Shkrirjen në një sipërmarrje të përbashkët të shtetit me drogën dhe krimin. Vendimarrjen në të gjitha nivelet të krimit të organizuar në Shqipëri. Këto ishin tezat kryesore që unë paraqita aty të faktuara me dokumente dhe që mund të them se ishin tronditëse për audiencën e nderuar. Natyrisht impakti, receptiviteti i kësaj ekspozeje ishte shumë pozitive.
Një numër i konsiderueshëm i anëtarëve të Asamblesë Parlamentare të Këshillit të Europës, shprehën direkt angazhimin e tyre për të ardhur si vëzhgues në zgjedhjet e ardhshme parlamentare.
Pata një takim të veçantë në komitetin antitorturë. Ai është një komitet i vetëm i kësaj natyre, me lidhje të fuqishme me institucionet e tjera. E informova për gjendjen dramatike të burgjeve dhe jo vetëm të burgjeve, për torturën që ushtrohet në komisariate, në qeli. Për serialin e vdekjeve të të rinjve shqiptarë si kurrë ndonjëherë me potencialin më të madh të helmuar nga droga.
Për gjobën e tmerrshme që paguajnë të burgosurit gjer në 2 mijë euro për të pasur kushtet më minimale.
Një vëmendje të veçante kishte këtu tortura publike që ata i bënë ish-presidentit, ish-kryeministrit, ish-kryetarit të parlamentit, Ilir Meta.
Këta zotërinj i informova se shqiptarët kanë humbur përfundimisht parimin e prezumimit të pafajësisë, pasi në burgjet e tyre, 67 për qind janë të paraburgosur. Nuk ka një vend të dytë në botë. Nga 15-20 përqind që është norma e fryrë, këtu është 67 për qind dhe kjo nuk ka ekzistuar as në diktaturën komuniste. Mendoj se ky ishte një takim shumë i çmuar, shumë i dobishëm me komitetin e antitorturës,” tha Kryetari i Partisë Demokratike duke vlerësuar se me takimet në Strasburg, u shkrinë të gjitha mashtrimet dhe dezinformimet e Edi Ramës dhe veglave të tij.

“Së fundmi, gjatë darkës që u shtrua, grupi parlamentar i PPE, na ftoi dhe ne ishim të nderuar të darkonim me presidentin e Asamblesë Parlamentare të Këshillit të Europës, zotin Rusopulos dhe kryetarin e grupit parlamentar të PPE, Pablo Hispan.
Tani unë këtu jam për të falënderuar me shumë mirënjohje kryetarin e grupit parlamentar të PPE për seancën që i kushtoi problemeve të Shqipërisë dhe opozitës shqiptare, zotin Pablo Hispan.
Të falënderoj me mirënjohje kryetarin e grupit parlamentar të demokratëve konservatore në Asamblenë Parlamentare të Këshillit të Europës, zotin Zolt Nemet.
Një mirënjohje të veçantë kam për kryetarin e Asamblesë Parlamentare të Këshillit të Europës, zoti Rusopulos. Për zëvendëspresidentin e komitetit antitorturë të Këshillit të Europës dhe ekipi që e shoqëroi atë. Për kryetarët e delegacioneve dhe delegacionet e Italisë, Greqisë, Suedisë për takimet që na rezervuan,” tha Kryetari i Partisë Demokratike, Sali Berisha, duke përfunduar:
“U shkrinë të gjitha mashtrimet, dezinformimet që Edi Rama me veglat e tij ka bërë në atë institucion dhe u bë më e qartë se ç’përfaqëson ky person, të cilit për herë të parë në historinë dhjetëra vjeçare, ky institucion i anulon darkën zyrtare. Ia anuluan darkën zyrtare.”

Ndryshe, në Asamblenë Parlamentare të KiE në Strasburg, Kryetari i Partisë Demokratike, Sali Berisha, zhvilloi takime me Grupin e Partive Popullore Evropiane, atë të Konservatorëve dhe Patriotëve Evropian, dhe takim me Presidentin e Asamblesë Parlamentare të Këshillit të Evropës, Theodoros Roussopoulos.