Pas takimi me Nd/Sekretarin e Shtetit, Osmani: Synim strategjik i Kosovës, anëtarësimi në INTERPOL
Pas takimit me Ndihmës Sekretarin për Byronë Ndërkombëtare për Narkotikë dhe Sundim të Ligjit të SHBA-ve, Todd D. Robinson, Presidentja e Kosovës, Vjosa Osmani tha se mbështetja e Shteteve të Bashkuara për Kosovën ka qenë në çdo hap të shtetndërtimit, nga momenti kur Kosova është detyruar të fillonte nga zeroja.
“Republika e Kosovës është thellësisht mirënjohëse për ndihmë që ka dhënë Byroja Ndërkombëtare për Narkotikë dhe Sundim të Ligjit të SHBA-ve për institucionet e Kosovës për gjatë viteve. Mbështetja e SHBA-ve për Kosovën ka qenë në çdo hap strategjik dhe në çdo hap të shtetndërtimit,” tha Vjosa Osmani duke falënderuar Shtetet e Bashkuara ndërsa rikujtoi se në Kosovë janë sjellë disa programe që janë të rëndësishme për vendin.
“Sukseset tona janë edhe dëshmi e bashkëpunimit me partnerët. Disa nga arritjet më të rëndësishme të institucioneve tona e kanë vulën e byrosë që drejton ndihmëssekretari, përfshirë edhe Policinë e Kosovës. Në takim me ndihmëssekretarin e informova për synimin strategjik të Kosovës për anëtarësim në INTERPOL që do të jetë i pamundur pa mbështetjen e SHBA-së,” tha Vjosa Osmani duke shtuar se të vetmit që përfitojnë nga mos anëtarësimi i Kosovës në INTERPOL janë kriminelët dhe grupet kriminale.
“Është dëshirë dhe vullnet i përbashkët që ata t’i luftojmë deri në fund dhe pa kompromis!”
Ndërsa Nd/Sekretari për Byronë Ndërkombëtare për Narkotikë dhe Sundim të Ligjit të SHBA, Todd D. Robinson, tha se porosia e tij është të tregojë se Shtetet e Bashkuara janë këtu për t’ju mbështetur në rrugën tuaj.
“Fakti që jam këtu për të treguar mbështetjen tonë për atë që po bëni ju, për atë që po bënë policia për qytetarët e rëndomtë, porosia ime është që SHBA është këtu për t’ju mbështetur në rrugën tuaj. Institucionet e Sigurisë, e Gjyqësorit, po punojnë për një Kosovë më të fortë dhe më transparente,” tha Todd D.Robinson.
Ndryshe, Nd/Sekretari për Byronë Ndërkombëtare të Narkotikëve dhe Çështjeve të Zbatimit të Ligjit të SHBA-së, Todd D. Robinson, e filloj dje vizitën në Kosovë me ndalimin në pikën kufitare të Vërmicës, ku u diskutua roli i bashkëpunimit kufitar në luftimin e krimit të organizuar dhe trafikimit ndërkombëtar.
Sipas agjendës së publikuar nga Departamenti amerikan i Shtetit, Nd/Sekretari Robinson do të qëndroj në Kosovë nga 20-22 Mars ku përveç takimit me Presidenten Vjosa Osmani do të takohet dhe me partnerët e Byrosë Ndërkombëtare të Narkotikëve në Prishtinë.
