Pas takimit/ Aleatët e PD: Zgjedhje me Edi Ramën nuk ka, protestat vazhdojnë…

Pas takimit që kryetari i Partisë Demokratike, Lulzim Basha zhvilloi me Aleatët, liderët e LSI, PR, PDK, PBDNJ, LZHK, shprehen qartë se zgjedhje me Edi Ramën kryeministër nuk mund të zhvillohen dhe se protestat do të vazhdojnë.

“Ne bëmë një takim të frytshëm me zotin Basha, ku siguruam solidaritetin tonë dhe vazhdimësinë e përbashkët të të gjithë lëvizjes. Zoti Basha do të vazhdojë me të gjitha takimet e tjera sot. Mesazhi kryesor i takimit është ky: Zgjedhje më datë 30 qershor nuk ka,” tha kryetari I LSHK, Dashamir Shehi, duke shtuar se po i sqarojmë qytetarët, përtej kësaj, që Partia Socialiste ka filluar manipulimin zgjedhor që tani:

“KQZ është spostuar atje ku janë arshivat, ne deklarojmë që sot se më shumë se 25 kandidatë nuk kanë garë konkurruese. Domethënë 36 bashki janë pa kandidatë alternativë. Që tani kanë rënë moralisht zgjedhjet. Këto po mundohen t’i falsifikojnë. I kanë spostuar komisionet, do të sajojnë kandidatë të sajuar këto dy – tre ditë, por ne gjykojmë se zyrtarë më shumë se 25 nuk ka.”

Qysh sot po ju lajmërojmë se ka filluar manipulimi zgjedhor, tha Dashamir Shehi pas takimit me Lulzim Bashën, dhe zgjedhjet kanë rënë moralisht.

“Kanë rënë edhe praktikisht, me letra në njëfarë mënyre. Por edhe sikur këta t’i mbushin plot ato letrat e veta, ne nuk do të lejojmë të ketë zgjedhje më datë 30 qershor, me të gjithë aksionin e mundshëm opozitar, 360 gradë.”

Nga denoncimi i këtyre fakteve, manipulimi që ka ndodhur, që nuk ka nevojë t’i bëjmë ne, sepse po i bëjnë të huajt, ndërkombëtarët, po i bën gazeta më e madhe europiane, Bild, që implikon në një farë mënyre vetë zotin Rama, tani nuk ka më nevojë për “hyzmeqarë’ poshtë, sqaroi Shehi , duke shtuar se është ai që merret vetë me vjedhjet e zgjedhjeve, pra, nga kjo pikëpamje këtu moral për zgjedhje nuk ka!

“Këtu moral për zgjedhjet më nuk ka. Aksioni fatkeqësisht do të spostohet në shumicë, në rrugë; sigurisht që nuk heqim dorë as nga takimet me ndërkombëtarët, as me informacionin për mediat, as me takimet e sallave me rininë e qyteteve, me intelektualët, por aksi kryesor do të jetë protesta e rrugës. Do të vazhdojmë për sa kohë të rezistojmë deri në fund derisa të mbërrihet në një zgjidhje që ne e konsiderojmë finale, jo për ne, as për PD-në dhe as për Bashën, por që e konsiderojmë pozitive për Shqipërinë.”

Ky është mesazhi kryesor, këtë diskutuam sot, këtë do të diskutojmë edhe në ditët në vazhdim, tha ai, deri më datë 30.

Në orën 17:00, Kryetari i Partisë Demokratike, Lulzim Basha do të zhvillojë një mbledhje të përbashkët me Kryesinë e PD-së dhe grupin parlamentar ku gjithashtu pritet të diskutohet axhenda e aksionit politik dhe protestave të qytetarëve të bashkuar.

Ndryshe, dje Kryetari i Partisë Demokratike, Lulzim Basha bëri të ditur se për sot ka thirrur forumet më të larta të Partisë Demokratike dhe një konsultë të të gjithë koalicionit të bashkuar të opozitës, për axhendën e aksionit politik dhe protestave të qytetarëve të bashkuar.

Ky është momenti, tha Lulzim Basha, për të intensifikuar dhe për të vazhduar me vendosmëri betejën tonë ndërsa e bëri të qartë dhe synimin: “T’i japim fund këtij aparteidi, një Shqipëri të tërë të përjashtuar nga mirëqenia, nga liria, nga barazia para ligjit, nga siguria, duke i dhënë fund një pakice që ka marrë peng vendin përmes pushtetit të fituar jo thjesht në tavolinë por të fituar me dhunën, kërcënimin, shitblerjen e votave në bashkëpunim me krimin e organizuar.”