Pas takimit historik në Shtëpinë e Bardhë, fillojnë përgatitjet për takimin Putin-Zelenskyy
Pikëpyetjeve të shumëta mbi takimin Trump-Putin në Alaskë iu shtuan pikëpyetjet nga takimi i mbrëmjes së të hënës së Presidentit amerikan Donald Trump me presidentin e Ukrainës, Volodymyr Zelenskyy, dhe liderët evropian, ndonëse u quajt historik!
Të gjithë u morën me rreshtimin që u bëri Presidenti amerikan liderëve evropianë në Shtëpinë e Bardhë, por ata të tillë ishin, të mbaruar, e futën në përtypje të mediave Nenin 5 të Traktatit të NATO-s si garanci për Ukrainën por nuk u sqarua se si i tillë ai vepron edhe sot kur dihet që nuk ka obliguar dhe nuk do të obligoj automatikisht anëtarët e NATO-s për ndërhyrje të plotë ushtarake por secili shtet anëtar “ndihmon palën ose palët e sulmuara duke marrë menjëherë, individualisht ose në bashkëpunim me të tjerët, veprimet që i konsideron të nevojshme, përfshirë edhe përdorimin e forcës së armatosur”.
Dhe, askush nuk foli më për atë që nuk do të flitet më, vendimin e prerë të Presidentit Trump:
“Krimenë e dha Presidenti Obama!”
Gjithësesi, liderët evropianë u ndanë të kënaqur me takimin në Shtëpinë e Bardhë. Kancelari gjerman Friedrich Merz tha se pritjet jo vetëm që u përmbushën, por u tejkaluan, ndërsa kryeministri britanik Keir Starmer vlerësoi se marrëveshja mund të jetë historike dhe se shumë gjëra janë rënë dakord.
Skeptik ishte Presidenti Macron por fjalët e tij ishin boshe ose sa për të thënë se është skeptik sepse është francez. Ai edhe pas takimit në Shtëpinë e Bardhë ku të gjithë e panë sikur Kryeministrin e Kosovës, Avdullah Hoti në vitin 2020, që po dëgjonte Presidentin amerikan, tha se nuk ishte i bindur se Rusia donte paqe dhe liderët evropianë ia “bënë të qartë Trumpit” se një marrëveshje paqeje nuk mund të priste javë ose muaj.
Cilët liderë, ata që ishin ulur pranë Maconit! Apo homologët e Emmanuel Macron që nuk e kanë idenë as çfarë po ndodhë në Ukrainë! Putin në negociatat që filluan në Stamboll vazhdimisht ka kërkuar reduktimin e ushtrisë ukrainase si parakusht për marrëveshje ndërsa Macron nga Washingtoni jep kumtin pas “takimit historik”.
“Do të na duhet një ushtri e fortë ukrainase dhe do të na duhet ta ndihmojmë Ukrainën me forca në terren!”
Përkundër këtij zhvillimi, si Ukraina ashtu edhe gjithë bota e ka një fat të madh, ka, Amerikën, Presidenti i së cilës e ka marrë seriozisht zgjidhjen e kësaj lufte të pakuptimt dhe sapo mbaroi takimin me Zelenskyyn dhe liderët evropian, Trump filloi përgatijen për takimin Trump-Putin-Zelenskyy aty ku do ti jepet fund përpjekjes për paqe ose luftës!
President Donald J. Trump on the phone with President Putin in the Oval Office. pic.twitter.com/RkWReNAT2b
— The White House (@WhiteHouse) August 19, 2025
“Në fund të takimeve, telefonova Presidentin Putin dhe fillova përgatitjet për një takim, në një vend që do të përcaktohet më vonë, midis Presidentit Putin dhe Presidentit Zelenskyy,” tha Presidenti Trump, duke shtuar se Zëvendëspresidenti i SHBA-së J. D. Vance, Sekretari i Shtetit Marco Rubio dhe i Dërguari i Posaçëm Steve Witkoff do të koordinojnë marrëveshjet midis dy vendeve ndërsa përfundoi:
“Kjo do të pasohej nga një takim trepalësh me mua!”
Folën për 40 minuta
Kjo bisedë Trump-Putin u konfirmua nga pala ruse. Biseda telefonike midis Trump dhe Putin zgjati 40 minuta, raportoi agjencia e lajmeve RIA, duke cituar zyrtarin e Kremlinit, Yuri Ushakov.
“Pati diskutime se do të ishte e vlefshme të shqyrtohej mundësia e rritjes së nivelit të përfaqësuesve nga pala ukrainase dhe ruse që marrin pjesë në negociata të drejtpërdrejta,” tha Ushakov.
Trump dhe Putin ranë dakord që do të jenë në kontakt të ngushtë në lidhje me krizën ukrainase dhe çështje të tjera, tha Ushakov.
Pra, duke gjykuar nga ajo që u raportua në mediat e afërta me liderët pjesëmarrës në takimet e Alaskës dhe Washingtonit, si dhe nga ajo që mund të lexohet nga deklaratat e zyrtarëve të lartë politikë, po vijnë ditë vendimtare që mund të përcaktojnë të ardhmen e Ukrainës, Rusisë dhe Evropës, ndërsa ndryshimet e mëdha gjeopolitike në të gjithë botën do të ndikojnë edhe në tokën shqiptare, Shqipëri, Kosovë, Luginë të Preshevës dhe Maqedoni Perëndimore.
