Pas takimit Kurti-Vuçiç, Von Cramon: Shpresoj që Albin Kurti ta kuptoj rëndësinë e këtij dialogu!

Raportuesja për Kosovën pranë Parlamentit Evropian, Viola von Cramon, vlerëson se takimi Kurti-Vuçiç ishte një hap i rëndësishëm në dialogun Kosovë-Serbi, meqë është takimi i parë prej se Albin Kurti erdhi në postin e Kryeministrit ndërsa shpreson se ai do të dëshmoj që e kupton rëndësinë e këtij dialogut, sepse vullneti është parakusht për suksesin e negociatave, e kjo vlen edhe për Serbinë si dhe Kosovën.

Kështu shprehet për të përditshmen serbe “Danas” Von Cramon duke folur për takimin e Kryeministrit të Kosovës, Albin Kurti, dhe Presidentit të Serbisë, Aleksandar Vuçiç, i cili u zhvillua në Bruksel me ndërmjetësimin e zyrtarëve të BE, Josep Borell dhe Mirosllav Laçak.

“Shohim që administrata e Bidenit ka pritshmëri të mëdha, por gjithashtu shohim domosdoshmërinë që Kryeministri Kurti të mos nxitoj, por të mendohet mirë për atë që është arritur deri më tani,” tha Raportuesja për Kosovën pranë Parlamentit Evropian duke shtuar:

“Puna e qeverisë së tij duhet të bazohet në arritjet e mëparshme. Megjithatë, këto do të jenë negociata komplekse dhe ne nuk duhet të presim domosdoshmërisht që menjëherë pas raundit të parë të arrihen rezultate, dhe duhet ta kemi parasysh se për asgjë nuk kanë ra dakord deri sa nuk bien dakord për të gjitha,” përfundon Raportuesja për Kosovën pranë Parlamentit Evropian, Viola von Cramon.

Ndryshe, Presidenti i Serbisë, Aleksandar Vuçiç, pas takimit me Kryeministrin e Kosovës, Albin Kurti ishte dukshëm i shqetësuar dhe akuzoi nga Brukseli gazetën “Danas” për propagandën më të zezë fashiste. Absurdi i kësaj sjellje të Vuçiç ishte edhe më i rëndë kur u kuptua se ai nuk reagon për raportimet që kishin të bëjnë me dialogun Kosovë-Serbi por për një lajm që ishte publikuar në këtë gazetë se vëllau i tij, Andrej Vuçiç kishte ndërhyrë në Njësitë bashkiake në Novi Sad ku u zhvilluan zgjedhjet lokale.