Pas takimit me Ambasadorët, Opozita e Bashkuar kërkesë Këshillit Politik, PS e refuzon!
Pas takimit që Kryetari i Partisë Demokratike, Lulzim Basha, zhvilloi me Zv/Ambasadoren amerikane, Leyla Moses Ones, Ambasadorin e BE, Luigi Soreca, dhe Ambasadorin e Britanisë së Madhe, Dunkan Norman, Opozita e Bashkuar kërkoi thirrjen e mbledhjes së Këshillit Politik për ditën e nesërme, me qëllim të prezantimit të kërkesës për marrjen e ekspertizës së OSBE/ODIHR, kërkesë e cila shumë shpejtë u hodhë poshtë nga Partia Socialiste.
“Me qëllim gjetjen e konsensusit për kërkesën e Opozitës së Bashkuar, për marrjen e ekspertizës së OSBE/ODIHR, për çështjet që nuk biem dakord në Këshillin Politik, siç parashikohet edhe në Marrëveshjen e 14 Janarit, kërkojmë: Thirrjen e mbledhjes së Këshillit Politik nesër, e mërkurë, në orën 10:00,” theksojnë përfaqësuesit e Opozitës së Bashkuar, Oerd Bylykbashi dhe Petrit Veseli duke saktësuar:
“Në këtë mbledhje Opozita e Bashkuar do të prezantojë kërkesën për marrjen e ekspertizës së OSBE/ODIHR. Përsa më lart, mbetemi në pritje të konfirmimit tuaj për mbledhjen e ditës së nesërme.”
Nuk vonoi shumë dhe PS e bënë të qartë se refuzon kërkesën e Opozites për të kërkuar ekspertizën e OSBE/ODIHR duke e bërë të qartë se nuk merr pjesë në mbledhjen e nesërme.
Përmes një njoftimi, Opozita e Bashkuar e bënë të qartë se në përgjigjen për opozitën, për kërkesën me temë “marrjen e ekspertizës së OSBE-ODIHR, për çështjet që nuk biem dakord në Këshillin Politik”. përfaqësuesi i PS, Damian Gjiknuri, mes të tjerash shprehet:
“Nuk mund të kërkoni që anëtarët e tjerë të Këshillit Politik, për të cilët zbatimi i Kushtetutës është një çështje që as vihet në diskutim, as zvarritet dhe as anashkalohet, të bëhen pjesë e kësaj kërkese, aq më tepër të kërkoni që ekspertiza e OSBE/ODIHR-it të keqpërdoret me prapamendim.”
Duke refuzuar kërkesën për të marrë opinionin e OSBE/ODIHR, Gjiknuri rendit pikat për të cilat duhet vazhduar puna, thekson Opozita e Bashkuar duke shtuar:
“Puna e do që ne të shtrojmë në tavolinë jo vetëm idetë, por mbi të gjitha propozimet tona të detajuara, pse jo draftet tona të plota e ezauruese për pragun zgjedhor, për formulën dhe procedurën për numërimin, tabulimin dhe kalkulimin e votave parapëlqyese, për regjistrimin e të drejtat proceduriale dhe materiale të koalicioneve zgjedhore, për pasqyrimin në fletën e votimit, për numërimin e votave, tabulimin dhe kalkulimin e votave parapëlqyese të listës së koalicionit”.
Në fund, Opozita e Bashkuar vlerëson se Damian Gjiknuri konfirmoi njëanshmërinë e akteve që PS po bën gati të miratojë.
“Ju informoj se ekipi i PS-së është në punë për të konkretizuar dispozitat e Kushtetutës dhe për t’ireflektuar ato respektivisht në Kodin Zgjedhor. Në cilësinë e përfaqësuesit e mazhorancës, në mbledhjen e ditës së Premte unë do të paraqes draftin me propozimet konkrete që reflektojnë ndryshimet Kushtetuese në Kodin Zgjedhor për çështjet e sipërcituara.”
