Pas takimit me Ambasadorin Kosnett, Mustafa: Zgjidhjen e jep Vetëvendosje jo LDK!

Kryetari i Lidhjes Demokratike të Kosovës, LDK, Isa Mustafa, pas takimit me Ambasadorin e SHBA në Kosovë, Philip Kosnett tha se zgjidhjen për koalicionin qeverisës e jep Vetëvendosje dhe jo LDK.

“Zgjidhjen e japin ata, jo ne,” tha Isa Mustafa duke u larguar nga selia e LDK-së.

Ndërsa Ambasadori i SHBA-së në Kosovë, Philip Kosnett, pas takimit prej rreth 45 minutave nuk foli për media, por mësohet se është diskutuar mbi përpjekjet për formimin e koalicionit bashkëqeverisës mes Lëvizjes Vetëvendosje dhe Lidhjes Demokratike të Kosovës.

Në takim me Ambasadorin e SHBA në Kosovë, Philip Kosnett, Kryetari i LDK, Isa Mustafa ishte i shoqëruar nga nënkryetarët Agim Veliu, Lutfi Haziri dhe Vjosa Osmani.

Mësohet se selinë e LDK-së sot e ka vizituar edhe Ish-Shefi i misionit të OSBE në Kosovë, William Walker.