Pas takimit me Bashën/ Aleatët, Shehi: Protesta e radhës do të mbahet…

Pas takimit me Kryetarit e Partisë Demokratike, Lulzim Basha, Aleatët theksojnë se në situatën politike në të cilën ndodhet vendi opozita është më e bashkuar se kurrë ndërsa në takim është vendosur që ti rikthehen protestave.

Kryetari i LZHK-së, Dashamir Shehi, duke folur për takimin me kryetarin e Partisë Demokratike, tha se opozita e bashkuar ka vendosur t’i rikthehet protestave javës që vjen në të gjitha qytetet e Shqipërisë për tu mbyllur nga fundi i javës me një tjetër protestë kombëtare.

“Po bëhemi gati për një miting tjetër të madh në Tiranë, nga fundi i javës që vjen. Në këtë situatë Shqipërinë e solli zoti Rama që do të bëjë zgjedhje. Opozita është më e bashkuar se kurrë. Deri më datën 30 Shqipëria dhe opozita do të jetë në këmbë,” tha Kryetari i LZHK-së, Dashamir Shehi.

Ndërsa Kryetari i PR, Fatmir Mediu, tha se duhet ndaluar ky “grusht shteti” i organizuar nga Kryeministri Edi Rama:

“Ne duhet të marrim çdo hap bashkë me qytetarët për të ndalur këtë grusht shteti të organizuar nga Rama. Për me tepër sjella e Ramës duke arrestuar protestuesit dhe përfaqësuesit është kriminale na kthen në kohët e errëta të komunizmit ku arrestoheshin kundërshtarët politike.

Është qartësuar tashmë edhe pozicioni i BE, që ka vendosur për të mos hapur negociatat dhe shtete të tjerë që po kërkojnë vendosjen e vizave. Nëse Rama e gjeti vendin vend të NATO dhe me viza të liberalizuara, sot po shkojmë hapa pas për shkak të papërgjegjshmërisë së Ramës dhe shqiptarët duhet të çohen dhe të reagojnë ndaj kësaj situate.”

Pas këtij dakordësimi me Aleatët, Kryetari i PD, Lulzim Basha do të zhvillojë një takim në orën 18:00 me Kryesinë e Partisë Demokratike dhe Grupin Parlamentar ku pritet të përcaktohen edhe detajet e aksionit opozitar.