Pas takimit me Bashën, Yuri Kim: Reforma Zgjedhore të përfundojë deri më 31 maj!

Pas takimit me Kryetarin e Partisë Demokratike, Lulzim Basha, Ambasadorja e SHBA në Tiranë, Yuri Kim, tha nga selia e PD se udhëheqësit shqiptarë duhet të përmbushin pritjet e popullit shqiptar, për të përfunduar Reformën Zgjedhore deri në 31 Maj ndërsa e pranoi se ndjehet e inkurajuar nga diskutimi që zhvilloi me liderin e Opozitës së Bashkuar dhe pret rezultate.

“Sapo zhvilluam një takim të mirë me zotin Basha. Diskutimi ynë ishte i vendosur për të ardhmen, jo për të shkuarën. Në veçanti folëm për rëndësinë se si udhëheqësit shqiptarë duhet të përmbushin pritjet e popullit shqiptar. Për të përfunduar reformën zgjedhore deri në 31 maj. Ky nuk është afat kohor që ka vendosur ambasada e SHBA apo faktor tjetër i jashtëm. Ky është një afat kohor që e kanë vendosur vet udhëheqësit në bindjen e tyre. Për nga përkufizimi, opozita ka një punë të madhe para,” tha Ambasadorja Yuri Kim duke përfunduar:

Ndihem e inkurajuar nga diskutimi që kemi zhvilluar dhe pres rezultat!

Ndërsa Kryetari i Partisë Demokratike, Lulzim Basha, duke u zotuar para kryediplomates amerikane në Tiranë, Yuri Kim se Reforma Zgjedhore do të përfundojë brenda 31 Majit tha se prioritet absolut i Opozitës së Bashkuar organizmi i zgjedhjeve të lira dhe të ndershme në mënyrë që edhe kjo krizë të marrë zgjidhje.

”Organizmi i zgjedhjeve të lira dhe të ndershme është prioritet absolut. Një orë e më parë në kutitë e votimit të pandikuar nga bandat, nga shitblerja e votës, paratë e korrupsionit. Jemi të vendosur për këtë betejë dhe jemi të vendosur që brenda 31 majit reforma zgjedhore do të mbarojë dhe do të bëjmë gjithçka që të zbatohet. Që dhe kjo krizë të marrë zgjidhje që shqiptarët të zgjedhin parlamentin dhe qeverinë që duan. Që t’i hapet dhe rruga për integrimin europian që është dhe zotim i opozitës.”