Pas takimit me Dendias, Rama: “Deti” në Hagë, tani patriotët do të gjejnë në ajër ndonjë çështje…

Për çamët që protestuan para Ministrisë së Jashtme dhe Kryeministrisë, Edi Rama kishte përgatitur dhunën dhe shoqërime në polici ndërsa pas takimit me ministrin e Jashtëm grek Nikos Dendias, tha se e konsideron Greqinë partner strategjik të Shqipërisë me të cilën theksoi se kanë rënë dakord për të zgjidhur të gjitha çështjet e mbetura pezull mes dy vendeve. Me këtë rast u tha shqiptarëve ashtu siç u kishte thënë sa ishte në opozitë para 8 viteve, se çështja e Detit ashtu si dhe Ligji i Luftës janë zgjidhur.

“Për ne Greqia ka qenë një  partner strategjik dhe mbetet i tillë. Ne e konsiderojmë Greqinë një fqinj të çmuar dhe patjetër që partneriteti është një partneritet për të ardhmen duke mos harruar asnjëherë gjithçka që na lidh nga e shkuara Greqia ka qenë një ndër vendet që jo vetëm morën pjesë, por edhe u përfshinë në kontributet e drejtpërdrejta gjatë konferencës së donatorëve dhe faktikisht ne sot përsëri kemi konfirmuar atë që kemi dakordësuar më parë.

Jemi dakord që të punojmë bashkë për të adresuar dhe zgjidhur me frymë konstruktive me angazhim të përbashkët të gjitha çështjet që duhen zgjidhur mes vendeve tona.

Nuk është një çështje e Greqisë, çështja e të drejtave të minoritetet grek në Shqipëri, është një çështja e jona gjithashtu. Nëse ne duam për minoritetin grek standardet më të mira dhe mundësi 100% të barabarta, këtë nuk e bëjmë se e kërkon Greqia, por sepse është në nderin dhe vizionin tonë.”

Sot Kryeministri Edi Rama tha se Shqipëria dhe Greqia kanë rënë dakort që për çështjen e detit do i drejtohen drejtësisë ndërkombetare, duke e shitur si zgjidhje të këtij problemi që e sajoi vetë si opozitar dhe pa sqaruar se çfarë do të ndodhë nëse epilogu është si ai kontestit Kroaci-Slloveni..

“Kemi rënë dakort që këtë çështje ta trajtojmë në instancat ndërkombëtare, së bashku Shqipëria dhe Greqia do i drejtohen drejtësisë ndërkombëtare për të vendosur pikat mbi i, në bazë të ekspertizës dhe në bazë të të drejtës ndërkombëtare të detit”.

Shprehu keqardhje për patriotët e detit, por nuk foli për çështjen, por nuk foli për mundësitë e një vendimi nga instancat ndërkombëtare siç i ndodhi Kroacisë:

“Më vjen keq për patriotët e detit por në këtë mënyrë duhet të gjejnë arsye të tjera për të shpallur patriotizmin e tyre se cështja e detit nuk është më një cështje me të cilën mund të bëjnë as propagandën e tyre të shpifur antigreke që është një turp dhe as elektorat patriotik në Shqipëri apo dhe në Kosovë.

Të vetëvendosen në cështje të tjera, kjo nuk është çështje që do jetë në diskrecionin tonë apo palës greke, por të drejtësisë ndërkombëtare dhe ne jemi plotësisht dakort e në këtë mënyrë do fokusohemi te bashkepunimi ekonomik e rajonal tek njerëzit që të bëjmë më të mirën për qytetarët grekë që jetojnë në Shqipëri dhe shqiptarët që jetojnë në Greqi,” tha Kryeministri Edi Rama para gazetarëve të dënuar me heshtje ndonëse e dinë se Kroacia me Slloveninë kishte kontest shumë të vogël por humbi të gjitha, pasi Gjykata e Hagës i dha 3/4 e zonës së kontestuar Sllovenisë dhe zhbëri dakordësinë që kishin palët 51%:41% dhe po diskutoin për 8% të hapsirër detare.

 Meqë ishin punë premtimesh foli dhe për Ligjin e Luftës. Dhe jo vetëm kaq:

“Kemi rënë dakord të fillojmë punën për të organizuar një mbledhje të përbashkët të dy qeverive për tu marrë me çështjet që kanë rëndësi për njerëzit e zakonshëm dhe për fëmijët tanë në Shqipëri dhe Greqi. Çështjet e patriotizmit nacional-folklorik nuk janë çështje të dy qeverive tona,” tha Rama ndërsa për heqjen e Ligjit të Luftës nga Greqia shtoi:

“Nuk është ende çështje që mund ta konsiderojmë të zgjidhur por është në një diskutim shumë pozitiv dhe së shpejti kam shumë besim që do të përfundojë në mënyrë pozitive, që është heqja e ligjit të luftës. Pasi humbën detin, nacional-folklorikët patriotë do të humbin dhe tokën dhe pastaj të gjejnë në ajër ndonjë çështje dhe të krijojnë një subjekt sesi Greqia po rrit emisionet e gazit në atmosferën shqiptare, se në tokë dhe në det nuk do të kenë më çështje për tu marrë,” vazhdoi me shkarat e tij Kryeministri Edi Rama ndërsa policia e tij po shkelte me këmbë çamët para Kryeministrisë ndërsa dhjetëra prej tyre i shoqëroi në polici.

Dhe derisa Kryeministri Edi Rama u mor me përsëritjen e premtimeve që koha kur ishte në opozitë, për Marrëveshjen e Detit dhe Ligjin e Luftës, Ministri i Punëve të Jashtme të Greqisë, Nikos Dendias, kishte hallin për minoritarët dhe Turqinë.

“Na bashkojnë shumë gjëra. Prezenca ime këtu synon në nënvizimin e një axhende pozitive. Ne kemi vullnet të fuqishëm që ti çojmë këtë marrëdhënie me lart dhe të zgjidhim  të gjitha ato gjëra që kanë mbetur pezull. Një ure lidhëse është minoritetet jonë në Shqipëri dhe shqiptarët që jetojnë në Greqi. Me lejoni zoti Kryeministër që të theksoj kontributet esencial qoftë të shtetasve grek në Shqipëri por edhe të shqiptarëve në Greqi.

Greqia dhe Shqipëria do të përballojmë sfida. Ne jemi të gatshëm të bëjmë çdo përpjekje dhe ne mendojmë se ky bashkëpunim mund të përforcojë integrimin e Shqipërisë në BE. Integrimi dhe hyrja e Shqipërisë në BE është objektiv i përbashkët. Ne jemi të gatshëm që të ecim me Shqipërinë,” tha Dendias duke iu ritkhyer axhendës së Selanikut ndonëse rezultoi e turpshme:

“Dëshiroj të theksoj se Greqia përmes axhendës së Selanikut ka mbështetur në mënyrë të qëndrueshme integrimin e vendeve të Ballkanit Perëndimor. Edhe me kryeministrin dhe me ministrin në detyrë Cakaj ne kishim një tematikë shumë të gjerë diskutimesh. Diskutim për çështjen e përcaktimit të hapësirave detare. Zgjidhja e kësaj divergjence do të jetë e vlefshme për të dyja vendet. Kam dëgjuar edhe dakrodësine e zotit Rama që zgjidhja ë kësaj çështja do të ketë si bazë marrëveshjen e OKB.

Jam i lumtur për këtë gjë, duke analizuar këtë cështje, kemi rënë dakord të kalojmë së bashku në të drejtën ndërkombëtare në Hagë

U referuam te marrëveshja e 96 mes Shqipërisë dhe Greqisë. Ramë dakord se marrëveshja e 96 ka nevojë për thellim, që të ecim bashkë për një marrëveshje të re dhe të mbrëmje një mbledhje qeveritare mes dy qeverive dhe të krijojmë një mekanizëm mes dy vendeve mike.

Ne kemi referuar çështjen e ligjit të luftës. Zoti kryeministër kjo është një anakronizëm. Jam i sigurt që edhe këtë të zgjidhim edhe këtë së bashku. Është gëzim i madh për mua që ta them këtë këtu nga Tirana, në opinionin publik shqiptar me urdhër të kryeministrit Mitsotakis,” tha kryediplomati grek për t’iu kthyer Turqisë nga Tirana:

“I referohem fqinjit tonë, Turqisë që vazhdon të shkelë cdo ditë kriteret themeltare të integrimit në BE, qoftë politike dhe ekonomike. Jam detyruar ti dërgojë një shkresë komisionerit të zgjerimit duke theksuar se Turqia që po shkel unionin doganor e duhet të shqyrtohet menjëherë marrja e masave për këtë gjë.

Gjithashtu kam vendosur këtë cështje me keqardhje madje, që të ekzaminojë komisioni të gjitha shkeljet në të gjithë dimensionin e tyre madhe deri në tërheqjen e unionit doganor si ide e qartë për shkeljet që krijon sjellja e Turqisë.

Kam theksuar gjithashtu edhe tek homologët e mi evropianë, ministrat e Jashtëm veprimet e fundit që janë tepër shqetësuese në Mesdheun Lindor e theksova nevojën të ndalojë eksporti i materialeve ushtarake përkundrejt Turqisë se përdoren për veprime që destabilizojnë zonën tonë,: tha shefi i dipolomacisë greke Nikos Dendias duke përfunduar:

Zoti kryeministër, po e mbyll fjalën time me: ajo që ne duhet të ndërtojmë të gjithë bashkë, është të kemi një të ardhme paqësore me begati për të gjithë. Kësaj përpjekje i shërben prezenca ime sot në Tiranë.“