Pas takimit me Escobar e Lajçak, Vuçiç: Besoj në zgjidhje kompromisi me Kosovën!
Pas diskutimeve me të dërguarin e posaçëm të Bashkimit Evropian për dialogun mes dy vendeve, Mirosllav Lajçak dhe të dërguarin amerikan për Ballkanin Perëndimor, Gabriel Escobar, gjatë ditë së enjte, Presidenti i Serbisë, Aleksandar Vuçiç, tha në orët e para të ditës së sotme se shpreson në një zgjidhje kompromisi me Kosovën, për çështjen e targave dhe dokumenteve serbe.
“Ne do të vazhdojmë bisedimet dhe besoj se në ditët në vijim do të mund të arrijmë një zgjidhje kompromisi, të paktën për një pjesë të vogël, pasi është e qartë se një zgjidhje e tillë nuk mund të arrihet fare sa u përket targave dhe disa çështjeve më të mëdha,” tha Vuçiç përmes një postimi në Instagram pas takimit me Escobar dhe Lajçak në Beograd ku ishin prezent edhe ambasadorët e SHBA-së dhe BE-së në Beograd, Christopher Hill dhe Emanuele Giaufret.
Vuçiç e pranoi me këtë rast se asgjë nuk është e sigurt, dhe se nevojiten shumë garanci.
“Por në ditët në vijim, ne do të vazhdojmë të punojmë shumë për të siguruar dhe ruajtur paqen për popullin tonë, dhe në të njëjtën kohë të sigurojmë të ardhmen për mbijetesën e serbëve në Kosovë.”
Ndërkohë Lajçak tha sot se pas një raundi të dytë të diskutimeve në orët e vona të natës, shpresoj se jemi në rrugën e duhur.
“Vlerësoj përpjekjet e sinqerta të presidentit Vuçiq për të mbështetur një zgjidhje evropiane. Bisedimet tona do të vazhdojnë,” tha sot përmes rrjetit social Twitter, Mirosllav Lajçak.
After a second round of discussions late last night, I hope we are on the right track. I appreciate @predsednikrs sincere effort to support a European solution. Our talks will continue.
— Miroslav Lajčák (@MiroslavLajcak) August 26, 2022
Ndryshe, ky takim i Presidentit të Serbisë me Escobar dhe Lajçak në Beograd u zhvillua pasi ata për dy ditë takuan në Prishtinë liderët politik dhe institucionalë duke përfshirë këtu dhe përfaqësuesit politikë të serbëve në Mitrovicën e Veriut.
Kryeministri i Kosovës, Albin Kurti dhe presidenti serb, Vuçiç janë takuar më 18 gusht në Bruksel, por takimi nuk ka pasur ndonjë rezultat konkret. Takimet e tyre janë mbajtur pas tensionimit të situatës në veri të Kosovës më 31 korrik, meqë serbët lokalë kanë vënë barrikada si shenjë pakënaqësie ndaj hapit të Qeverisë së Kosovës për zbatim të vendimeve për targat dhe dokumentet serbe./RFE/
