Pas takimit me Escobar, Komshiç: SHBA nuk pranon ndryshimet e Daytonit

Ndryshimi i kufijve që janë përcaktuar me Marrëveshjen e Dejtonit nuk do të jetë i pranueshëm për Shtetet e Bashkuara, tha anëtari i presidencës trepalëshe të Bosnje dhe Hercegovinës, Zhelko Komshiç, pas takimit me Zv/Ndihmës Sekretarin amerikan të Shtetit për Evropën dhe Euroazinë, dhe i dërguari për Ballkanin Perëndimor, Gabriel Escobar.

“Vlerësimi i Escobar është që gjithçka që po ndodhë në Bosnje Hercegovinë është një krizë artificiale dhe nuk ka asnjë bazë reale. Shtetet e Bashkuara mbështesin anëtarësimin e Ballkanit Perëndimor në Bashkimin Evropian sa më shpejt që të jetë e mundur,” tha Komshiç duke shtuar se në takim nuk është diskutuar për sanksione të mundshme ndaj politikanëve të caktuar në Bosnje, por bisedimet janë përqendruar në luftën kundër korrupsionit dhe krimit.

“Ne gjithmonë do të kemi mbështetjen e Shteteve të Bashkuara për procese të tilla,” tha Komshiç.

Anëtari serb i Presidencës së Bosnjes, Millorad Dodik, së fundmi ka kërcënuar me largim të Republikës Srpska nga institucionet kombëtare, siç është autoriteti i taksave, agjencia për ilaçe dhe nga ushtria.

Në një intervistë për RFE, në prag të vizitës në Bosnje e Hercegovinë, Escobar tha se do të fliste me Ambasadorin e SHBA në Sarajevë, para se të shpallte sanksionet e mundshme për cenim të marrëveshjes së Daytonit, pa specifikuar se cilat sanksione mund të ishin një fjalë. Ai gjithashtu tha se në konsultim me ambasadorin do të vendoste nëse do të takonte liderin serb të Bosnjes, Millorad Dodik.

Anëtari boshnjak i presidencës së Bosnje Hercegovinës, Shefik Xhaferoviç, tha sot pas takimit me Eskobarin se u diskutua për vazhdimin e rrugës evropiane të vendit.

“Është e nevojshme që vendet e Ballkanit Perëndimor të bashkëpunojnë ekonomikisht në tregun ekonomik rajonal, në kuadër të Procesit të Berlinit, nën kujdesin e Bashkimit Evropian,” tha Xhaferoviç duke bërë të ditur se kishte informuar Escobarin se ishte e papranueshme që institucionet shtetërore të bllokoheshin, pasi autoritetet e Republikës Srpskas kishin bojkotuar punën e tyre që nga korriku, kur ish-Përfaqësuesi i Lartë në Bosnje, Valentin Inzko imponoi ndryshime në ligjin penal që ndalon mohimin e gjenocidit dhe krimet e luftës. Në njoftimin për vizitën e Escobarit, ambasada e SHBA në Sarajevë tha se Escobar do të qëndrojë në Sarajevë dhe Banja Llukë për të përsëritur mbështetjen e SHBA për sovranitetin dhe integritetin territorial të Bosnje Hercegovinës./RFE/