Pas takimit me Grupin e Punës, Lajçak: Pas 6 muajsh paraqesim gjetjet konkrete

Përfaqësuesi Special i Bashkimit Evropian për dialogun Kosovë-Serbi, Miroslav Lajçak, pas takimit me Grupin e Punës në Bruksel lidhur për çështjen e targave tha se Grupi do të takohet rregullisht dhe beson se pas 6 muajve do t’i paraqesin gjetjet konkrete.

“Këtë mëngjes në Bruksel, mirëprita delegacionet e ekspertëve për takimin e parë të Grupit të Punës për targat, siç ishte rënë dakord më 30 shtator. Grupi i kryesuar nga këshilltarët e mi do të takohet rregullisht. Unë besoj se ata do të paraqesin gjetje konkrete në 6 muaj,” thekson Miroslav Lajçak pas takimit.

Ndryshe, iniciativa për takim të këtij niveli erdhi pasi Kosova vendosi masën e reciprociteti për targat e automjeteve nga Serbia, dhe pasoi me një reagim kriminal të palës serbe duke bllokuar pikat kufitare në veri të Kosovës.

Pas 13 ditësh të bllokimit të pikave kufitare në Jarinje e Bërnjak, në Bruksel u arrit Marrëveshja mes Kosovës dhe Serbisë, për largimin e barrikadave dhe Policisë së Kosovës, pikë kjo e parë e Marrëveshjes. Pika e dytë e Marrëveshjes ishte vendosja e stikerave në automjetet, e cila filloi të zbatohet nga data 4 tetor.