Pas takimit me Komisionerin për Zgjerim/ Kriza dhe Negociatat, Basha: Mbështesim strategjinë e KE!

Pas takimit me Komisioneri për Zgjerim të BE-së, Olivér Várhelyi, Kryetari i Partisë Demokratike, Lulzim Basha, tha se Opozita e Bashkuar mbështetë strategjinë e re të cilën do ta paraqesë Komisioneri Várhelyi dhe Presidentja e re e Komisionit, Von der Layen, ndërsa u gjetë dakordësia e plotë se zgjidhja e krizës kalon përmes zgjedhjeve të lira e të ndershme, sipas kushteve të Bundestagut.

“Së pari, dua të përshëndes dhe të mirëpres ardhjen e një komisioneri si Varhelyi në portofolin shumë të rëndësishëm të Zgjerimit, që ka të bëjë me anëtarësimet e vendeve të reja. Më prezantoi me strategjinë që do të paraqesë ai dhe presidentja e re e Komisionit, Von der Layen, strategji të cilën unë dhe opozita e bashkuar e mbështesim plotësisht. ”

Nga ana jonë, tha lideri i opozitës, prezantuam dhe gjetëm dakordësi të plotë se zgjidhja e krizës së rëndë politike në Shqipëri, përmes zgjedhjeve të lira dhe të ndershme, të paraprira nga një reformë zgjedhore dhe zbatimi i asaj reforme sipas kushteve të Bundestagut dhe hapja e negociatave të anëtarësimit, janë dy objektiva madhore në harmoni dhe në përputhje të plotë me njëri – tjetrin.

“Në këtë kuadër mirëprita ndihmën e Bashkimit Europian që mundësoi dialogun politik për reformën zgjedhore jashtë parlamentit ilegjitim të dalë nga krimi i organizuar, si hap i parë për të çuar drejt rivendosjes së demokracisë reale në Shqipëri, ku qytetarët dhe jo kriminelët të zgjedhin pushtetarët që nga parlamenti, qeveria, kryebashkiakët, e kështu me radhë,” tha Kryetari i Partisë Demokratike, Lulzim Basha, duke përfunduar:

“Pa ndodhur kjo, pa kthyer legjitimitetin e institucioneve kryesore në vend asgjë nuk do të bëjë përpara, nuk do të ketë as zhvillim, as punësim, as ekonomi dhe as ndalje të emigracionit që po shpopullon Shqipërinë me ritme të frikshme.”

Ndryshe, Komisioneri për Zgjerimi i BE-së, Olivér Várhelyi,  pas takimit me Kryeministrin Edi Rama tha se pas vizitës në Paris dhe takimet që kishte me përfaqësuesit holandezë, shpreson shumë që negociatat do të çelen përpara Samitit të Zagrebit, e për këtë tha se po punojnë me kryeministrin dhe shtetet anëtare ndërsa e pranoi se pa mbështetjen e opozitës shqiptare nuk do të jetë e mundur të ketë përparim.