Pas takimit me Konjufcën, Basha: Prioritet, vazhdimi i njohjeve ndërkombëtare
Kryetari i Partisë Demokratike, Lulzim Basha, pas takimit me Kryetarin e Parlamentit të Kosovës, Glauk Konjufca, tha se prioritet i Partisë Demokratike është vazhdimi i njohjeve ndërkombëtare, anëtarësimi i Kosovës në institucionet ndërkombëtare dhe përfundimi me sukses i dialogut Kosovë-Serbi ndërsa Konjufca u shpreh se i erdhi mirë kur i dëgjova qëndrimet zyrtare të Partisë Demokratike të Shqipërisë për sfidat të cilat e presin Kosovën në të ardhmen.
“E sigurova për mbështetjen e plotë dhe koherente të Partisë Demokratike, me të gjitha sfidat me të cilat përballet Kuvendi, qeveria dhe institucionet e Kosovës, si dhe mbështetjen e plotë dhe vëllazërore për të gjithë qytetarët e Kosovës, në sfidat e brendshme të zhvillimit ekonomik, të tejkalimit të pasojave social ekonomike të pandemisë dhe mbi te gjitha në qëndrimin krah për krah me institucionet e Kosovës për përballjen e sfidave të tjera ku për Partinë Demokratike dhe për mua personalisht prioritet mbetet vazhdimi i njohjeve ndërkombëtare, anëtarësimi i Kosovës në institucionet ndërkombëtare dhe përfundimi me sukses i dialogut midis Republikës së Kosovës dhe Republikës së Serbisë,” tha Lulzim Basha duke përfunduar:
“Me njohjen e ndërsjelltë të këtyre dy shteteve si një investim i domosdoshëm për të çimentuar stabilitetin dhe orientimin euroatlantik , të rajonit tonë, të gjithë vendeve të Ballkanit Perëndimor.”
Ndërsa Kryetari i Parlamentit të Kosovës, Glauk Konjufca, duke folur për takimin tha se qëndrimet e Partisë Demokratike të cilat i shpjegoi kryetari Basha, janë shumë të rëndësishme për Kosovën dhe e ndihmojnë për pozicionimin e saj në proceset e ardhshme si me dialogun me Serbinë ashtu dhe në sfidat e integrimeve europiane.
“Patëm një takim shumë të frytshëm duke i trajtuar temat më te rëndësishme nëpërmjet të cilave shqyrtojmë gjendjen e Republikës së Shqipërisë, por edhe atë të Republikës së Kosovës. Fati i shteteve tona është i përbashkët meqenëse ne jemi një komb dhe më erdhi mirë kur i dëgjova qëndrimet zyrtare të Partisë Demokratike të Shqipërisë për sfidat të cilat e presin Kosovën në të ardhmen. Në veçanti prekëm dialogun me Serbinë në të cilën Kosova po përballet me qëllimet e Serbisë, të cilat rezultatin përfundimtar synojnë ta kenë destabilizimin e Kosovës dhe krijimin e një entiteti territorial Serb brenda Kosovës të kontrolluar nga Beogradi duke e hapur edhe planin e Athisarit.
Më gëzoi shumë fakti që qëndrimet e Partisë Demokratike të Shqipërisë janë shumë të rëndësishme për Republikën e Kosovës, të cilat i shpjegoi edhe në fund të qëndrimeve të Partisë Demokratike të Shqipërisë, kryetari Basha. Këto na ndihmojnë për pozicionimin e Republikës së Kosovës në proceset e ardhshme, edhe në dialogun që e kemi me Serbinë, por edhe në sfidat e integrimeve europiane, sepse vetëm duke patur një pozicion unik, të përbashkët e për të cilin punojmë duke e ndërtuar bashkë në vazhdimësi, të dy shtet tona mund të kenë sukses. Me zëra të ndarë, të fragmentuar, me qëndrime kundërthënëse, të cilat na kanë ndodhur ndonjëherë në të kaluarën, kemi përjetuar vetëm dëme të dy shtetet tona,” tha Kryetari i Parlamentit të Kosovës, Glauk Konjufca, duke përfunduar:
“Sa më të unifikuar që të jenë qëndrimet tona, atëherë mendoj që do të jetë më e lehtë për ne që të kemi prosperitet, por edhe më e shpejt rruga jonë drejt synimit tonë përfundimtar, që është hyrja në Bashkimin Europian. Zoti Basha faleminderit për mikpritjen, jeni të mirëseardhur për një vizitë në Kosovë.”
Ndryshe, Kryetari i Parlamentit të Kosovës, Glauk Konjufca, po qëndron për vizitë zyrtare në Tiranë ku po zhvillon takime me liderë institucional dhe politikë të Shqipërisë.
