Pas takimit me kreun e SPAK, Yuri Kim: Të ndiqen penalisht pavarësisht se sa të fuqishëm janë apo cilës parti i përkasin

Pas takimit me kreun e SPAK, Arben Kraja, Ambasadorja e Shteteve të Bashkuara në Tiranë, Yuri Kim, tha se SPAK duhet të ndjekë penalisht korrupsionin dhe krimin e organizuar, pavarësisht se sa i fuqishëm, i pasur, apo cilës parti i takon personi.

“U takova me shefin e SPAK, Arben Kraja, për të nënvizuar pritshmërinë që SPAK do të ndjekë penalisht korrupsionin dhe krimin e organizuar – pavarësisht se sa i fuqishëm apo i pasur, pavarësisht se cila parti. Me më shumë prokurorë dhe hetues të rinj të BKH, SPAK po jep gjithnjë e më shumë rezultate çdo ditë,” thekson Ambasadorja Yuri Kim përmes rrjetit social Twitter duke përfunduar:

“Që nga fillimi i vitit 2021, SPAK ka hapur 264 raste të reja (218 korrupsion + 46 organizata krim). 127 persona janë dënuar. Vendimet përfundimtare të gjykatës konfirmuan konfiskimin e € 70+ milion që tani i janë transferuar shtetit shqiptar. Hap pas hapi…”

Ndryshe, Ambasadorja e SHBA, Yuri Kim, e bëri këtë deklaratë pas takimit me kreun e SPAK, Arben Kraja dhe dy ditë para seanës së parë të Legjislaturës së X-të të Parlamentit të Shqipërisë ku 5 deputetë tashmë kanë hequr dorë nga mandati dhe ende nuk dihet edhe sa të tjerë do të dorëhiqen pasi, siç tha Ambasadorja Kim, tashmë e kanë të qartë se do të ndjeken penalisht për korrupsion dhe krimin e organizuar, pavarësisht se sa të fuqishëm janë dhe cilën parti itakojnë.