Pas takimit me Kryeministrat Rutte dhe Bettel, Kurti: Duam marrëveshje evropiane!

Nga dialogu me Serbinë duam marrëveshje evropiane, tha KryeministriAlbin Kurti, pas takimit me Kryeministrin e Holandës, Mark Rutte, dhe Kryeminsitrin e Luksemburgut, Xavier Bettel, ku folën për marrëdhëniet e Kosovës me vendet e Beneluksit si dhe dialogun Kosovë-Serbi.

“Në lidhje me dialogun për normalizimin e  marrëdhënieve me Serbinë, kam theksuar se Kosova është e interesuar për marrëdhënie të mira fqinjësore. Ne dëshirojmë zgjidhje evropiane dhe për këtë e kemi marrëveshjen bazike të 27 shkurtit dhe aneksin e zbatimit të 17 marsit, për të cilën dëshirojmë që të zbatohet në plotësi, pa vonesa dhe pa kushte,” tha Kryeministri i Kosovës duke falënderuar Holandën dhe Luksemburgun për ndihmat e dhënë deri më tani por  edhe në arenën ndërkombëtare në anëtarësim në organizatat evropiane, si në KiE etj.

“Gjithashtu kërkova që të na ndihmojnë për sa i përket programit të NATO-s, Partneritetit për paqe dhe të ecim më tutje drejt marrjes së pyetësorit nga Komisioni Evropian sa i përket anëtarësimit në BE, ku ne tashmë e kemi bërë aplikimin tonë zyrtar,” tha Kryeministri Kosovës, Albin Kurti, duke shtuar se progresi demokratik i Kosovës është mundësi e mirë për BE-në që të transformojë Ballkanin Perëndimor.

Ndërsa Kryeministri i Luksemburgut, Xavier Bettel, nga ana e tij tha se se nevojitet dialog i hapur mes Kosovës dhe Serbisë, e nëse do të ketë konflikt nuk do të ketë fitues në fund.

“Kur është planifikuar ky udhëtim nuk e kemi ditur që do të ketë tensione. Ne tentojmë të ndërtojmë ura. Ne dje ishim në Beograd dhe sot jemi në Prishtinë. Është e rëndësishme për ne që e dimë që ka udhërrëfyes për dialog e ai është Lajçaku. Ne duhet të largojmë çdo mundësi për kriza të mundshme të cilat më së shumti i vuan populli. Ju mund të llogarisni në ne. Për ne është e rëndësishme të besojmë në punën e lehtësuesve të BE-së. Është mirë të ketë dialog të hapur. Ne do të takohemi me OJQ-të,” tha Bettel duke shtuar se Kosova është pjesë e familjes evropiane ndërsa përfundoi:

“Ne si politikanë marrim vendime, por populli i vuan pasojat.”

E Kryeministri i Holandës, Mark Rutte, i drejtëpërdrejtë si në Beograd tha se shteti që ai përfaqëson përkrahë Kosovën dhe Serbinë në rrugën e dialogut, me qëllim të normalizimit të raporteve, dhe se shtensionimi i situatës është i rëndësishëm jo vetëm për paqen, por edhe për prosperitetin drejt integrimit në Bashkimin Evropian.

“Sot i kemi shprehur shqetësimet tona për ngritjen e tensioneve mes Kosovë dhe Serbisë. Holanda dhe Luksemburgu tentojnë të normalizojnë situatën drejt dialogut dhe deeskalojnë situatën, t’i normalizojnë raportet mes dy shteteve. Shpresoj që kjo është e rëndësishme jo vetëm për paqen në rajon, por edhe për prosperitetin drejt integrimit në BE,” tha Rutte duke siguruar se Holanda e përkrah Kosovën drejt integrimit dhe në rrugën për mbrojtjen e lirive dhe të drejtave të njeriut.

“Ne shohim mundësi për bashkëpunime më të afërta ekonomike me Kosovën dhe Holanda është investitori i tretë më i madhi në Kosovë. Mund të bëjmë edhe më shumë, të punojmë për çështjen e migracionit, për të bërë më shumë në fushën e liberalizimit të vizave. I përkrahim përpjekjet e Kosovës për vizat dhe jam i sigurt se shumë hapa do të bëhen. Në gjithë Ballkanin Perëndimor jemi të gatshëm t’i ndihmojmë Kosovës.”

Ndërkohë foli dhe për shtensionimin e situatës në veri.

“Duhet të implementohet hap pas hapi dhe në mënyrë të përpiktë dhe çështja është që në udhërrëfyesin evropian, shtensionimet të jenë nga të dyja palët. Jam optimist që mendjet e ftohta të mbizotërojnë, të gjithë dëshirojnë shtensionim, është interes i të gjithëve për të bërë këtë. Nëse mund të ndihmojmë jemi këtu. Jam i sigurt që do të mbërrijmë atje, por s’kemi arritur ende,” tha Kryeministri i Holandës duke u shprehur qartë se drejtimi i gishtit kah fajtori në situatën e krijuar në Kosovë nuk do të zgjidhte problemet ndërsa përfundoi

“Në momentin që BE-ja nis të gjejë fajtorin dhe të drejtojë gishtin, ku palët thonë se kanë të drejtë, e humbim pozicionin. Se çka dëshirojmë është që kjo ekonomi të rritet. Unë dua që Serbia të jetë më e suksesshme, që Ballkani Perëndimor të jetë i suksesshëm. Jam historian dhe e dua historinë, dua të dijë pse gjërat janë ashtu si janë. Të shohim të ardhmen dhe të se çka mund të bëjmë në të ardhmen.”

Para takimit me Kryeministrin Kurti, kryeministrat e Holandës dhe Luksemburgut, Mark Rutte dhe Xavier Bettel, ata zhvilluan takim me Presidenten Vjosa Osmani ku ajo u shpreh se Kosova mbetet e përkushtuar që sfidat aktuale politike dhe të sigurisë t’i tejkalojë me partnerë dhe aleatë.

“Duke eksploruar rrugë të reja bashkëpunimi dhe duke nxitur lidhjet ndërmjet qytetarëve të Kosovës me ata të Holandës dhe Luksemburgut do ta ndërtojmë një partneritet edhe më të fortë nga i cili do të përfitojnë të tri shtetet,” tha Presidentja Vjosa Osmani pas takimit.

Ndryshe, kryeministrat e Holandës dhe Luksemburgut, Mark Rutte dhe Xavier Bettel, vijnë në Prishtinë pas vizitës që zhvilluan në Beograd dhe ku i bënë të qartë Presidentit Aleksandar Vuçiç, hapat që duhet të ndjek Serbia për shtensionimin e situatës, për të cilat ai qartë tha se nuk ishte dakord.