Pas takimit me Kryeministrin Albin Kurti, Haradinaj: SHBA të emëroj një Të Dërguar për dialogun Kosovë-Serbi
Kryetari i Aleancës për Ardhmërinë e Kosovës, AAK, Ramush Haradinaj pas takimit me Kryeministrin Albin Kurti tha se ka dëgjuar qëndrimet e kreut e qeverisë dhe ka shprehur shqetësimet e tij, ndërsa për dialogun Kosovë-Serbi tha se do të ishte mirë sikur SHBA të emëronte një Të Dërguar të Posaçëm:
“Tema ishte dialogu me datën 6 maj i kanë dërgua letër kryeministrit dhe kam kërkuar takim për çështjen e dialogut dhe pas kërkesës u kemi përgjigjur takimit. I kemi dëgjuar qëndrimet e kryeministrit dhe kam shprehur shqetësimet e mia. Prezencën e SHBA-së është mëse e nevojshme, do të ishte me dobi emërimi i emisarit nga Amerika,” tha Kurti duke e konsideruar Lajçakun një nivel të ulët të përfaqësimit për axhendën e Kosovës sepse e ardhmja e dialogut është e rëndësishme.
Pas takimit me Kryetarin e AAK, Ramush Haradinaj, Zyra e Kryeministrit tha Haradinaj ka kërkuar përfshirje më të madhe të Shteteve të Bashkuara të Amerikës në dialog krahas Bashkimit Evropian ndërsa ka shprehur gatishmërinë për bashkëpunim me Qeverinë për tema të interesit nacional.
“Kryeministri i Republikës së Kosovës, Albin Kurti, së bashku me zëvendëskryeministrin e parë për Integrim Evropian, Zhvillim dhe Dialog, Besnik Bislimi, priti në takim kryetarin e Aleancës për Ardhmërinë e Kosovës, z. Ramush Haradinaj dhe nënkryetarin e parë, Ardian Gjini. Kryeministri Kurti e njoftoi z. Haradinaj për takimet që pati me përfaqësuesit më të lartë të Bashkimit Evropian në Bruksel dhe për përgatitjet për procesin e dialogut të ardhshëm me Serbinë. Z. Haradinaj kërkoi përfshirje më të madhe të Shteteve të Bashkuara të Amerikës në dialog krahas Bashkimit Evropian. Ai theksoi gatishmërinë e tij dhe të AAK-së për bashkëpunim me Qeverinë për tema të interesit nacional,” thekson Zyra e Kryeministrit përmes një komunikate duke rikujtuar se Kryeministri i Kosovës, Albin Kurti, ka deklaruar vazhdimisht se për çështjet me interes kombëtar do të konsultohet dhe do të kërkojë bashkëpunim të mirëfilltë me partitë dhe liderët opozitarë.
Ndryshe, nesër Kryeministri Albin Kurti pritet të takojë Kryetarin e Lidhjes Demokratike të Kosovës, Lumir Abdixhiku, ndërkohë kreu i PDK-së, Enver Hoxhaj ka refuzuar takimin me Kurtin.
Kryeministri Albin Kurtit ka ftuar tre liderët e partive opozitare me qëllim të informimit dhe bashkërendimit të spektrit politik për çështje me interes të Kosovës.
