Pas takimit me Kryeministrin Rama, Tusk: Shqipëria meriton çeljen e negociatave!

Presidenti i Këshillit Evropian, Donald Tusk, pas takimit me kryeministrin Edi Rama, tha sot në Tiranë se Shqipëria meriton çeljen e negociatave:

“Sot mund të them që në saj të përpjekjeve tuaja i jemi afruar këtij objektivi dhe askush nuk duhet të ketë as dyshimin më të vogël, as këtu në Tiranë dhe as në kryeqytete e vendeve të BE.

Në qershor, krerët e shteteve dhe qeverive të BE, u angazhuan për të dhënë një vendim të qartë për ju dhe Maqedoninë e Veriut për çeljen ose jo të negociatave, në tetor të këtij viti. Po i afrohemi gjithnjë e më shumë këtij momenti.”

Presidenti i Këshillit Evropian përsëriti se ka qenë gjithnjë i mendimit që BE duhet të çelë negociata për anëtarësim si me Shqipërinë ashtu edhe me Maqedoninë e Veriut.

“Vendi juaj duhet të trajtohet me të njëjtin respekt ashtu si edhe vendet e tjera të rajonit. Në takimin e sotëm diskutuam edhe rëndësinë që ka për Shqipërinë ruajtja e historikut solid në lidhje me luftën kundër krimit të organizuar, pra sundimin e ligjit. ky fiksim i BE-së me sundimin e ligjit, marrëdhëniet e fqinjësisë së mirë dhe pajtimi është pjesë e ADN-së sonë dhe ka për të qenë e tillë edhe kur ju të bëheni shtet anëtar, ndryshe projekti Europian nuk s’do të qëndronte në themele të forta. Nuk do të mund të ketë Europë të sigurt pa integrimin e Ballkanit Perëndimorë në BE. Kjo do të thotë që askush nuk po i bën askujt ndonjë nder.“

Kryeministri Edi Rama pas takimit bëri të ditur se ka dekoruar sot Presidentin e Këshillit Evropian me medaljen e “Yllit të Madh të Mirënjohjes”.

“Dua t’i akordoj titullin Yllin e Madh të Mirënjohjes Presidentit të KiE dhe me atë rast, duke ndarë disa momente të rëndësishme, jo vetëm simbolikisht në historinë e përbashkët, mes vendit të tij dhe vendit tonë.

Nga ana tjetër më vjen shumë mirë ta nënvizoj qartësinë që Presidenti Tusk është shprehur në raport me këtë proces dhe padiskutim të çmojë para opinionit publik përpjekjen e tij konstante  si një avokat i procesit të zgjerimit dhe afrimit të mëtejshëm të Ballkanit Perëndimor, konkretisht të Shqipërisë dhe Maqedonisë së Veriut,” tha Kryeministri Rama, medalje për të cilën Presidenti i Këshillit Evropian u shprehë:

“Sot ju më thatë që unë e meritoj këtë medalje, jo vetëm personalisht, por edhe për mbështetjen  e dhënë për procesin e integrimit, medalja m ë e madhe për mua do të ishte çelja e negociatave për Shqipërinë.”