Pas takimit me kryetaren e CDU, Basha: Me ardhjen e PD në pushtet, plan strategjik për investimet gjermane!
Kryetari i PD, Lulzim Basha, pas takimit me kryetaren e CDU-së, Annegret Kramp Karrenbauer, sot në Lajpcig u shpreh se Partia Demokratike do të angazhohet për të përmbushur të gjithë hapat e përcaktuar në vendimin e Bundestagut, duke nisur me miratimin e reformës zgjedhore që i hap rrugë zgjedhjeve të lira dhe të ndershme.
“E falënderova kryetaren e kristiandemokratëve gjermanë për ndihmën dhe përkrahjen e CDU me ekspertët e saj më të mirë për planin tonë ekonomik, zbatimi i të cilit do të ndihmojë për nxjerrjen e vendit nga kriza duke hapur vende pune me paga dinjitoze në veçanti për të rinjtë,” tha Lulzim Basha duke bërë të ditur edhe për jetësimin e planit strategjik me ardhjen në pushtet:
“Sapo PD-së ti besohet qeverisja e vendit, me ndihmën e CDU dhe kryetares Annegret Kramp Karrenbauer do të vëmë në jetë një plan strategjik kombëtar për investimet gjermane dhe të huaja me potencial të madh për zhvillim dhe për të hapur mijëra vende pune.”
Ndryshe, kryetari i Partisë Demokratike, Lulzim Basha për dy ditë ka marrë pjesë në Kongresit të partisë simotër, të CDU-së së Angela Merkelit që po zhvillohet Lajpcig ku ka zhvilluar takime me figurat drejtuese kristiandemokrate si Dr.Johann Wadephul, Dr.Gunther Krichbaum, drejtuesit e ekipit ekonomik në Bundestag dhe në partinë simotër.
Në fokus të takimeve me përfaqësuesit më të lartë të politikës gjermane në Berlin por edhe me përfaqësuesit në Bruksel ishin hapja e negociatave me BE, ku lideri i opozitës ka falënderuar CDU-në gjermane për hapjen rrugë të mocionit të Bundestagut, planit me 9 pika dhe udhërrëfyesit për nxjerrjen e Shqipërisë nga kriza, ndërsa iu konfirmua vazhdimi i kësaj mbështetje. Temë e bisedimeve në takimet e zhvilluara ishte edhe plani ekonomik i Partisë Demokratike i cili është hartuar me ndihmën e ekspertëve më të mirë të kristiandemokratëve gjermanë, të partisë dhe Fondacionit Conrad Adenauer.
