Pas takimit me Kurtin, Abdixhiku: Pa pjesëmarrjen e SHBA nuk duhet të ketë dialog me Serbinë!
Pas takimit me Kryeministrin Albin Kurti, Kryetari i Lidhjes Demokratike të Kosovës, LDK, Lumir Abdixhiku, tha se Kurti si Kryeministër ka ndryshuar qëndrime në temën e reciprocitetit, kërkim-faljes së Serbisë ndaj Kosovës si dhe dialogut të brendshëm, para atij të jashtëm ndërsa vetë Abdixhiku i kërkoi qartësim për deklaratat rreth dokumenteve për dialogun Kosovë-Serbi, kërkesë që t’ia paraqesë Parlamentit qëndrimin zyrtar për dialog dhe ofertën e LDK-së për këtë dialog, për të cilin ajo mendon se pa pjesëmarrjen e SHBA as që duhet të zhvilohet.
“Ne bëmë një qartësim, një kërkesë dhe një ofertë. Qartësimi ishte mbi dokumentet e dorëzuara te kryeministri. Ne ri konfirmuam edhe një herë se të gjitha dokumentet që ka pasur qeveria e kaluar i janë dorëzuar kryeministrit. Nëse nuk i kanë ose i kanë humbur, mund t’i kërkojnë sërish. Bëmë një kërkesë që kishte të bënte me pozicionin politik që kjo qeveri duhet ta ketë dhe të prezantojë në Kuvend. Kosova duhet të dijë se cili është qëndrimi i qeverisë për dialogun. Po e presim një pozicion të tillë dhe bëmë një ofertë, ku i dorëzuam kryeministrit një dokument mbi pozicionin politik që ne mendojmë që Qeveria e Kosovës duhet ta ketë. Kryeministri tashmë ka një dokument, pozicionin politik të LDK-së që ne mendojmë se ai duhet ta trajtojë në Bruksel. Ky dokument përmban parime që janë diskutimi mbi bazën e vendimit të Gjykatës Ndërkombëtare të Drejtësisë për pavarësinë e Kosovës, mbrojtja e integritetit territorial, ruajtja e karakterit unitar të Kosovës dhe rendit kushtetues. Gjithashtu, rezultati final duhet të jetë njohja e ndërsjellë dhe anëtarësimi në BE e NATO,” tha Abdixhiku duke shtuar se tani është koha që Kryeministri Kurti ta dëshmojë veten mbi temat që sipas tij tashmë ka qëndrim të ridizajnuar.
“Vërejta që kryeministri, jo vetëm për çështjen e reciprocitetit, por edhe shumë tema të tjera që i ka pasur si kauzë ka ndryshuar pozicion në dialog. Por tani është koha e tij të dëshmojë veten dhe Kosovën në këtë përfaqësim… Janë pozicionet e reciprocitetit, kërkim-falja, dialogu i brendshëm para dialogut të jashtëm. Tani janë këto pozicione të ri-dizajnuara të kryeministrit.”
Dhe jo vetëm kaq! Lumir Abdixhiku tha se LDK nuk do të jetë pjesë e asnjë ekipi negociator, por do të ketë rolin e saj për dialogun në Parlamentin e Kosovës.
“LDK është pjesë e institucioneve të Kosovës dhe është në parlament. Kosova nuk ka nevojë për ekipe negociatore, sepse ajo e ka qeverinë. Ka një interpretim të Gjykatës Kushtetuese që kërkon që qeveria të jetë bartëse e dialogut,” tha Kryetari i LDK duke tërheq vërejtjen se nuk duhet të ketë vazhdim të procesit të dialogut në Bruksel pa pjesëmarrjen e SHBA-së.
“Pjesëmarrja e SHBA-së është e pakontestueshme. Pra, pa pjesëmarrje të SHBA nuk duhet të ketë dialog. Kosova vlerëson rolin e Bashkimit Evropian, por domosdoshmërish e kërkon përfshirjen e SHBA-së në dialog,” tha Kryetari i Lidhjes Demokratike të Kosovës, Lumir Abdixhiku.
Ndryshe, ky është takimi i dytë Kkryeministrit Albin Kurti me liderët opozitarë. Për dallim nga Abdixhiku dhe Haradinaj, ushtruesi i detyrës së kryetarit të PDK-së, Enver Hoxhaj nuk pranoi të takohet me Kryeministrin e Kosovës.
