Pas takimit me Kurtin, Lajçak: Në dialog, Kosova të flas me një zë!
Përfaqësuesi i Posaçëm i Bashkimit Evropian për dialogun Kosovë-Serbi, Mirosllav Lajçak ditën e dytë në Kosovë e ka rezervuar për takime me liderët e partive politike. Fillimisht ai ka takuar kryetarin e Lëvizjes Vetëvendosje, Albin Kurtin, takim në të cilin Lajçak tha se theksoi nevojën që Kosova të flasë me një zë në dialogun
“Fillova ditën e dytë në Kosovë me një diskutim shumë të mirë dhe frytdhënës me udhëheqësin e Vetëvendosjes, Albin Kurti. Theksova nevojën që Kosova të flasë me një zë në dialogun e lehtësuar nga Bashkimi Evropian. Çfarëdo marrëveshje duhet të jetë e pranueshme për njerëzit e saj,” tha Mirosllav Lajçak pas takimit përmes një postimi në rrjetin social Twitter.
Ndërsa deputetja e Lëvizjes Vetëvendosje, Fitore Pacolli, tha se Përfaqësuesi i Posaçëm i Bashkimit Evropian për dialogun Kosovë-Serbi, Mirosllav Lajçak është shprehur se pa pjesëmarrjen e Lëvizjes Vetëvendosje dhe Albin Kurtit, nuk ka marrëveshje me Serbinë.
Fitore Pacolli, që ishte dhe pjesë e takimit me Lajçak, tha se ekipi i tij janë marrë vesh që me Lëvizjen Vetëvendosje t`i shtojnë kontaktet. Sipas Pacollit, Vetëvendosje ka kërkuar mbajtjen e zgjedhjeve pasi qeveria aktuale nuk është kredibël.
Pas takimit me Albin Kurtin, Përfaqësuesi i Posaçëm i Bashkimit Evropian për dialogun Kosovë-Serbi, Mirosllav Lajçak, u takua me kryetarin e LDK-së, Isa Mustafa dhe kryetarin e AAK-së, Ramush Haradinaj.
Në ditën e parë të vizitës së tij, Përfaqësuesi i Posaçëm i Bashkimit Evropian për dialogun Kosovë-Serbi, Mirosllav Lajçak, u takua me Presidentin, Hashim Thaçi, kryeministrin e tij, Avdullah Hoti, dhe Kryetaren e Parlamentit, Vjosa Osmani.
