Pas takimit me Kurtin, Sorensen: Një fillim i mirë!
Një fillim i mirë, e cilësoi I dërguari i Posaçëm i BE-së për dialogun Kosovë-Serbi, Peter Sorensen, takimin me Kryeministrin Albin Kurti dhe Zv/Kryeministrin e ngarkuar me dialogun, Besnik Bislimi.
“Ishte një takim prezantues, folëm për atë se si mund të vazhdojë procesi përpara. Është një fillim i mirë,” tha Peter Sorensen pas takimit që pasoi atë me Presidenten Vjosa Osmani, ndërsa vlerësimin përfundimtar tha ai do ta bëjë sapo të ketë zhvilluar takimet edhe me përfaqësuesit e Serbisë
“Por, është shumë e qartë që procesi i dialogut përfshinë dhe një numër të madh të zhvillimeve të rëndësishme dhe duhet të merremi edhe me to”
Më pas Sorensen u përballë me një tufë pyetjesh “Anti-Kurti” dhe merakun që këto media kanë për Serbinë dhe kompromisin që duhet të bëjë Kosova, por I dërguari i BE sqaroi:
“Dialogu është që të pajtohemi dhe tani kompromiset përcaktohen nga palët. Por, ky është dialogu, këtë e kemi bërë që nga viti 2011,” tha Peter Sorensen pas takimit me Albin Kurtin ndërsa kur u pyet nëse do ndryshojë dialogu, ishte i prerë:
“Ne jemi të rinj në fakt, dhe si lehtësues do të punojë në mënyrën time!”
Në fund, për shqetësimet që kanë mediat e batonëve dhe buzhalëve për mbylljen e institucioneve paralele serbe në Kosovë, I dërguari i Posaçëm i BE-së për dialogun, Peter Sorensen, ishte i qartë pse është në Kosovë ndërsa data u përcaktua nga kalendari:
“Duhet të punojmë, të sigurohemi që njerëzit të shërbejnë në mënyrën më të mirë të mundshme!”
Para këtij takimi, I dërguari i Posaçëm i BE-së për dialogun, u takua me Presidenten e Kosovës, takim pas të cilin Vjosa Osmani u shpreh se kishte kërkuar që Kosova të trajtohet e barabartë në procesin e dialogut dhe në rrugën drejt BE-së.
“Në takim me Përfaqësuesin e Posaçëm të BE-së, Peter Sørensen, diskutuam dialogun Kosovë-Serbi të lehtësuar nga BE-ja, sigurinë në rajon dhe integrimin evropian të Kosovës,” u shpreh Presidentja e Kosovës, Vjosa Osmani përmes rrjetit social Facebook duke përfunduar:
“Kosova është dëshmuar tashmë si pala konstruktive në dialog, e angazhuar për paqe, demokraci e sundim të ligjit, prandaj mbajtja e masave të padrejta të BE-së ndaj vendit tonë po i dëmton jo vetëm qytetarët tanë por edhe balansin e nevojshëm në dialog.”
Ndryshe, Peter Sorensen, është zgjedhur Përfaqësuesi i Posaçëm i BE për dialogun Kosovë-Serbi nga Përfaqësuesja e lartë e Bashkimit Evropian për Politikë të Jashtme dhe Siguri, Kaja Kallas, duke zëvendësuar Miroslav Lajçakun, të cilit mandati i skadoi më 31 janar.
Takimi i fundit në Bruksel i ndërmjetësuar nga Miroslav Lajçak, është zhvilluar më 17 dhjetor të vitit të kaluar.
