Pas takimit me Kurtin, Vuçiç: Pa i zgjidhur çështjet me Kosovën s’mund të hyjmë në BE

Presidenti i Serbisë, Aleksandar Vuçiç e pranoi me përfundimin e Samitit BE-Ballkani Perëndimor se shteti i tij nuk do të jetë në gjendje që t’i bashkohet Bashkimit Evropian nëse nuk zgjidh çështjet me Kosovën.

“Ka perspektivë për zgjerim, por është e qartë se jo të gjithë anëtarët e BE-së kanë të njëjtin oreks,” tha Vuçiç pas Samitit në Bërdo dhe pas takimit me Kryeministrin e Kosovës, Albin Kurti, ku u shpreh qartë:

“Pa i zgjidhur çështjet me Prishtinën, Serbia nuk do të jetë në gjendje që t’i bashkohet BE-së!”

Ndryshe, burime të afërta me takimin Kurti-Vuçiç kanë konfirmuar për RFE mbajtjen e këtij takimi në prezencë të kancelares gjermane, Angela Merkel dhe presidentit të Francës, Emmanuel Macron, teksa në Bërdo të Sllovenisë u zhvillua samiti. Deri më tani, nuk ka detaje në lidhje me përmbajtjen e takimit.

Në Samitin BE-Ballkani Perëndimor i cili u zhvillua Bërdo të Sllovenisë, Kosova u përfaqësua nga kryeministri, Albin Kurti, ministrja e Punëve të Jashtme, Donika Gërvalla dhe ministri i Financave, Punës dhe Transfereve, Hekuran Murati.